सडकका खाल्डाखुल्डी पुर्न प्रधानमन्त्री तहबाटै निर्देशन आएको थियो । तर, काठमाडौं उपत्यकाका सडकको अवस्थामा सुधार हुन सकेन । अझैपनि सडकको अवस्था कष्टकर छ । सरकारी निकायहरु एक–अर्कालाई दोष थोपर्दै पन्छिने गरेका छन् । सडकमा भएका खाल्डाखुल्डीमा पानी जम्ने समस्या उस्तै छ ।
आर्थिक वर्ष २०७६/७७ मा सडक पुनःनिर्माणका लागि २६ अर्बको माग भएपनि सडक वोर्डले जम्मा आठ अर्ब बजेट विनियोजन गरेको छ । त्यसमा पनि ७० प्रतिशत बजेट राष्ट्रिय राजमार्ग मर्मत–संहारका लागि खर्च गर्नुपर्ने सडक विभागको भनाइ छ । असोज १० गतेभित्र काठमाडौं उपत्यकाका सडकका खाल्टाखुल्डी पुर्ने भनिएपनि निरन्तर पानी परेकाले काम गर्न समस्या भएको विभाग बताउँछ । काठमाडौंमा खानेपानी, ढल लगायतका विभिन्न परियोजनाका लागि सडक खन्ने र पुर्ने गर्दा धेरै पटक टाल्नुपर्ने अवस्था आएको छ ।
मुख्यतः काठमाडौंमा चावहिल, चुच्चे पाटी, ललितपुरको ठेचो लगायतका स्थानमा सडक मर्मत हुन सकेको छैन । मर्मतका लागि २०७४ सालमा तत्कालीन प्रधानमन्त्री शेरबहादुर देउवाले १५ दिनभित्र सडकका खाल्डा पुर्न निर्देशन दिनुभएको थियो । यसैलाई प्रधानमन्त्री केपी शर्मा ओलीले पनि निरन्तरता दिनुभयो ।
गत वर्ष पनि प्रधानमन्त्री केपी शर्मा ओलीले असार अन्तिम सातामा ५० दिनभित्र सडकका खाल्डा पुर्न र सडकको मर्मत गर्न निर्देशन दिनुभयो । तरपनि राजधानीका सडकमा खाल्डाखुल्डी उस्तै छन् । काठमाडौंका सडकमा रहेका खाल्डाका कारण जनताले वर्षेनी सास्ती भोग्नु परेको छ । सडकका खाल्टाले वर्षायाममा धेरै सवारीसाधन चिप्लिएर दुर्घटना हुने गरेको छ । पैदलयात्रीलाई सवारीसाधनले हिलोले छ्याप्ने हुदाँ कर्मचारी, विद्यार्थीहरुलाई झनै सास्ती झेल्नुपरेको छ ।
Discussion about this post