नेपाली लेखक संघमा ‘तेल भिसा’ कृतिमाथि परिचर्चा

पोखरा, १२ भाद्र । नेपाली लेखक संघ, कास्कीले कवि सुरेन्द्र अस्तफलको कवितासङ्ग्रह तेल भिसा माथि परिचर्चा कार्यक्रम सम्पन्न गरेको छ । शनिबार पोखरामा आयोजित एक समारोहमा उक्त समालोचक डा.भूमिराज बस्ताकोटीले सो कृतिमाथिको परिचर्चा प्रस्तुत गरेका हुन् ।
उक्त कार्यक्रममा कृतिको परिचर्चा गर्दै परिचर्चाकार डा. भूमिराज बस्ताकोटीले तेल भिसा समसामयिक जीवनको उत्कृष्ट प्रतिबिम्ब उतार्न सफल कविता कृति रहेको बताए । उनले कविको विषय प्रस्तुतिको शैलीलाई मुक्तकण्ठले प्रशंसा गरे । सरल भाषा र शैलीमा गहन भाव पस्कन सक्नु सुरेन्द्रको वैशिष्ट्य रहेको उनको ठम्याइ थियो । सङ्ग्रह पठनीय हुँदाहुँदै पनि यसमा केही विचारगत, अर्थगत, वर्णविन्यासगत त्रुटिहरू रहेको र त्यसले कृतिलाई उत्कृष्ट बन्नबाट रोकेको उल्लेख गरे ।
उक्त परिचर्चा कार्यक्रममा प्रमुख अतिथिका रूपमा बोल्दै नेपाली लेखक संघका केन्द्रीय अध्यक्ष एवम् कवि तीर्थ श्रेष्ठले राज्यले स्रष्टा–लेखकहरूलाई सम्मान गर्न नसकेकोमा दुःख प्रकट गरे । व्यक्तिगत क्षमताकै आधारमा केही सर्जकहरू लेखेर बाँच्ने अवस्था भए पनि अधिकांश उत्कृष्ट कृति सिर्जना गर्ने सर्जक एवम् लेखक पनि लेखनकै आधारमा सम्मानित जीवन बाँच्न सक्ने अवस्था नभएको बताए । समग्र लेखकहरूको हकहितका लागि लेखक दिवस मनाउने प्रस्ताव नेपाली लेखक संघले राखेको र प्रतिलिपि अधिकार प्राप्तिका लागि लेखक संघको लडाईँ निष्कर्षमा पु¥याएर छाडिने प्रतिबद्धता व्यक्त गरे । त्यसका लागि सारा लेखकहरू एकजुट हुनुपर्नेमा उनले जोड दिए । सुरेन्द्र जस्तै निरन्तर साधना गर्ने सर्जकको जीवनको सुरक्षाका लागि र लेखकीय स्वतन्त्रताका लागि देशभरका लेखकहरू एक हुन र लेखक संघको अभियानलाई साथ दिन पनि उनले आग्रह गरे ।
सो क्रममा सुरेन्द्रको लेखनशैली र क्रियाशीलता अनुसरणीय रहेको कुरा उल्लेख गर्दै डा. ईश्वरमणि अधिकारीले उनको उज्ज्वल साहित्यिक भविष्यको शुभकामना व्यक्त गरे । कार्यक्रममा कवि अस्तफलले आफ्ना दस कवितासमेत वाचन गरेका थिए । कविता प्रस्तुतिसँगै मन्तव्य व्यक्त गर्दै अस्तफलले कृतिमा रहेका त्रुटिलाई आगामी लेखनमा सच्याउँदै लैजाने प्रतिबद्धता जनाए । आगामी समयमा आख्यान लेखनतर्फ लाग्ने सङ्केत गर्दै उनले साहित्य साधनाले आफूलाई सकारात्मक ऊर्जा प्राप्त भएको सुनाए ।
चितवनमा रही नेपाली कविता लेखनका क्षेत्रमा विगत तीन दशकदेखि क्रियाशील सुरेन्द्र निरन्तर कविता साधनामा तल्लीन छन् । उनी नेपाली लेखक संघका केन्द्रीय सदस्यसमेत रहेका उनी संघको चितवन शाखाका वर्तमान अध्यक्ष हुन् ।
नेपाली लेखक संघ, कास्की शाखाका अध्यक्ष सञ्जीव पौडेलको अध्यक्षतामा सम्पन्न भएको सो कार्यक्रमको सञ्चालन सचिव कमल पौडेल अथकले गरेका थिए भने उपाध्यक्ष रीता अधिकारी रितु ले स्वागत मन्तव्य राखेकी थिइन् ।