अमरराज नहर्की, दमौली । कोरोना महामारीका कारण यातायात ब्यवसाय धरासायी बन्न थालेपछि टर्की पालनमा लागेको तनहुँका कृष्णप्रसाद पौडेलले राम्रो आम्दानी लिन सफल हुनुभएको छ ।
जिल्लाको ब्यास नगरपालिका ११ पोल्याङका पौडेल लकडाउन हुनुअघि यातायात ब्यवसायी रहेका थिए । गत चैत्र दोस्रो साताबाट भएको लकडाउनका कारण आम्दानी रोकिएपछि सुरु भएको टर्की पालनले अहिले ब्यवसायिक रुप लिन थालेको छ ।
व्यासभूमी यातायात व्यावसायी समितिमा सञ्चालक समितिको सदस्य रहनु भएका पौडेललाई उहाँकी श्रीमती शोभा र दुई सन्तानले टर्की पालनमा सहयोग गर्दै आएका छन् ।
५० वटा टर्की ल्याएर पाल्दा राम्रो आम्दानी भएपछि टर्की पालनलाई ब्यवसायिक बनाउने सोच पलाएको पौडेलले बताउनुभयो ।
टर्की पालन व्यवसाय सजिलो हुनुका साथै राम्रो र छिटो आम्दानी लिन सकिने भएकाले अन्य आफन्त तथा छिमेकीहरु समेत टर्की पालन तर्फ आकर्षित भएको उहाँले बताउनुभयो ।
उहाँका अनु्सार पोल्याङमा अन्य परिवारले समेत दश वटा देखि ७० वटासम्म टर्की पाल्न थालेका छन् । यस अघि लोकल कुखुरा तथा बट्टाई पालन तालिम समेत लिसकेको पौडेलले अहिले प्रतिलट ५० हजार मुनाफा लिन सफल छन् । तीन देखि ६ महिनामा मासुका लागि योग्य हुने टर्की ५ देखि ७ किलोसम्म सम्म हुने पौडेल पत्नि शोभाले बताउनुभयो । टर्कीको मासुको बजार मुल्य हाल प्रतिकेजी एक हजार रुपैयासम्म पर्ने उहाँले जानकारी दिनुभयो ।
टर्कीको मासु बोसोरहित हुने र मानिसको हड्डी मजबूद बनाउनुका साथै मुटु,सुगर प्रेसर लगायतका दीर्घकालिन रोगी सबै प्रकारका बिरामीले खाना मिल्ने भएकोले यसको मासुको माग बढि रहेको छ । टर्की पालन ब्यवसायमा क्षति कम हुने भएकाले पोल्याङका वासिन्दा त्यसतर्फ आर्कषण बढ्न पुगेको सोही ठाउँ निवासी शिक्षक लोकराज सेढाईले जानकारी दिनुभयो ।
उहाँका अनुसार पोल्याङमा हाल १४ परिवारले टर्की पाल्न थालेका छन् । ‘पाल्नको दुःख पनि छैन, महिनामै ५० हजार जति नाफा पनि हुने’ शोभाले भन्नुभयो ‘फाल्टु समयको सदुपयोग पनि भएको छ कमाई पनि राम्रो छ ।’
एक सय टर्की पाल्दा ६ महिनाको अवधिमा झण्डै रु.चार लाख सम्म कमाउन सकिने अर्का स्थानीय किसान पौडेल बताउनुहुन्छ । लोकल कुखुरा, खसीबोकाको तुलनामा टर्कीको मासु भन्दा स्वादिष्ट र फाइदाजनक रहेकोले संम्भव भए र पाएसम्म बुझ्ने मानिसहरुले टर्कीकै मासु खाने गरेका छन् ।
ए ग्रेड जातको टर्की नौ महिनामा १८ किलोग्राम सम्म तौल हुन्छ । उहाँले भन्नुभयो ‘शुरु शुरुमा त काटेर बिक्री गर्न गाह्रो गाह्रो भयो, अहिले हप्तामा एउटा टर्की घरमै काट्दा बिक्री भैरहेको छ ।’
गाउँ घरमा सबैले टर्की पाल्न शुरु गरेपछि केहि महिना अघि आफुले पनि ७० वटा टर्की ल्याएर पाल्न थालेको अर्का स्थानीय सुभद्रा कार्की पराजुलीले बताउनुभयो । तीन महिना अघि देखि ल्याएर आफुले पहिलो पटक टर्की पाल्न शुरु गरेको उहाँले जानकारी दिनुभयो । उक्त क्षेत्रका थप २० घर परिवारले समेत टर्की पाल्नको लागि चल्ला माग गरिरहेको कृषक पौडेलले बताउनुभयो ।
पौडेले बन्दाबन्दी खुलेर यातायात सञ्चालन भएता पनि बैकमा तिर्नुपर्ने किस्ताका लागि टर्की पालनबाट हुने आम्दानीले सहज भएको बताउनुभयो ।
Discussion about this post