लेखनाथ, २९ चैत्र । नेपाली कांग्रेस कास्की क्षेत्र नं १, क्षेत्रीय सम्मेलनको सम्पूर्ण तयारी पुरा भएको छ । शुक्रबार लेखनाथमा क्षेत्रीय कार्यसमितिको बैठक अघि पत्रकारहरुसँग कुराकानी गर्दै पार्टीका क्षेत्रीय सभापति राजेन्द्रमणी लामिछानेले सम्मेलनको तयारी पुरा भएको जनाएका हुन् ।
लेखनाथ स्थित लेखनाथ उद्योग वाणिज्य संघकोे सभाहलमा शनिबार हुने सम्मेलनको उद्घाटन नेपाली कांग्रेसका केन्द्रीय सदस्य डा. चन्द्र भण्डारीले गर्ने कार्यक्रम तय भएको लामिछानेले बताए । नेपाली कांग्रेस पार्टीमा बौद्धिक नेताको छवी बनाएका नेता भण्डारीले सम्मेलनको क्रममा संगठन सुदृढिकरण सँगै ‘कृषि, पर्यटन, र जलश्रोतको आधार, सम्मृद्धि र विकास युवा रोजगार’ विषयमा प्रशिक्षण दिनेछन् ।
पार्टीको विधानमा हरेक तहले एक वर्षमा एकपटक सम्मेलन गर्नै पर्ने व्यवस्था भए बमोजिम ३० वटा वडा रहेको कास्की क्षेत्र नं १ को सम्मेलन गर्न लागिएको क्षेत्रीय सचिव ओमप्रकाश गुरुङले जानकारी दिए । ‘यस क्षेत्रमा पार्टीका करिब ६ हजार क्रियाशिल सदस्य रहेका छन् । जसमध्येबाट ८ सय जना प्रतिनिधिहरुले सम्मेलनमा सहभागिता जनाउँनेछन् ।’ गुरुङले भने, ‘पार्टिका भातृ सङगठन सदस्य, शुभचिन्तक, पार्टीका समर्थक लगायतलाइ पनि कार्यक्रममा सहभागिताको लागि खुल्ला गरिएको छ ।’
गुरुङका अनुसार सांगठनिक र आर्थिक प्रतिवेदन प्रस्तुत गरिने कार्यक्रममा कांग्रेसका प्रदेश एवं जिल्लास्तरका नेताहरु समेत सहभागी हुनेछन् । सम्मेलनको अवसरमा विभिन्न ३० वटै वडा सभापतिहरुलाई सम्मान समेत गर्ने कार्यक्रमको रहेको सचिव गुरुङले जानकारी दिए ।
Discussion about this post