ह्याप्पी बर्थडे पारस !

आज अक्टोबर २४ तारिख, नेपाली क्रिकेटलाई यहाँसम्म पुर्‍याउन महत्वपूर्ण योगदान दिने खेलाडी पारस खड्काको जन्मदिन ।

केही दिनअघि नेपाली राष्ट्रिय क्रिकेट टोलीको कप्तानबाट राजीनामा दिएका पारस खड्काको जन्मदिनमा प्रशंसकहरुका साथै अन्तर्राष्ट्रिय क्रिकेट काउन्सिल(आईसीसी) ले समेत शुभकामना दिएको छ ।

बिहीबार दिउँसो आईसीसीले एउटा ट्वीट गर्दै पारसको सफलताको चर्चा गर्दै पारसलाई जन्मदिनको शुभकामना दिएको छ ।
आईसीसीले पारसको सफलता उल्लेख गर्दै लेखेको छ ।

अन्तर्राष्ट्रिय क्रिकेटमा नेपालका लागि सबैभन्दा बढी रन बनाउने खेलाडी
टी–२० अन्तर्राष्ट्रिय क्रिकेटमा शतक हान्ने नेपालका पहिलो र एक मात्र खेलाडी
एकदिवसीय क्रिकेटमा नेपालका लागि शतक हान्ने पहिलो र एक मात्र खेलाडी
जन्मदिनको शुभकामना पथप्रदर्शक पारस खड्का !

पारस नेपाली क्रिकेटमा सर्वाधिक सफल कप्तान र खेलाडी हुन् । सन् २००४ मा राष्ट्रिय टोलीमा पारसले डेब्यू गरेका थिए । सन् २००९ देखि राष्ट्रिय टोलीको कप्तानी सम्हालेका पारसले थुप्रै बाधा अवरोध र समस्यालाई पार लगाउँदै विश्वमा उदाहरणीय क्रिकेट देशको रुपमा नेपाललाई चिनाए ।

सन् २००९ मा विनोद दासपछि पारसले कप्तानको जिम्मेवारी पाएका थिए । उनले एसीसी टी–२० एलिट कपमा मलेसियाविरुद्ध पहिलो खेल कप्तानी गरेका थिए ।

पारसको कप्तानीमा नेपालले डिभिजन ५ देखि ३ सम्मको उपाधि जितेको छ । त्यस्तै पारसले सन् २०१४ मा नेपाललाई पहिलो पटक टी–ट्वान्टी विश्वकप खेलाएका थिए ।

पारसले आफ्नो कप्तानीमा नेपाललाई वान डे मान्यता, पहिलो वान डे सिरिज र टी–ट्वान्टी सिरिज जिताएका थिए । पारस नेपालबाट वान डे र टी–ट्वान्टी दुवैमा शतक प्रहार गर्ने एक्लो र पहिलो खेलाडी समेत हुन् ।

साथै उनी टी–२० क्रिकेटमा लक्ष्य पछ्याउँदा शतक प्रहार गर्ने विश्वकै पहिलो कप्तान पनि बनेका छन् । नेपाली टाेलीकाे कप्तानबाट राजीनामा दिए पनि पारसबाट नेपाली क्रिकेटले अझ बढी आशा गरेकाे छ । नेपाली क्रिकेटले पारसकै सहयाेगमा टेस्ट मान्यता पाओस् । एकपल्ट फेरि जन्मदिनकाे शुभकामना पारस !