हरिशयनी अर्थात् तुलसी एकादशीको पावन अवसरमा पोखरा महानगरपालिका–३१, माझीकुना हिलेचौरस्थित सुन्दरीडाँडामा टोलका स्थानीयवासीहरूको सक्रिय सहभागितामा वृक्षारोपण तथा सरसफाइ कार्यक्रम सम्पन्न भएको छ।
कार्यक्रम अन्तर्गत बर, पिपल, धुपी, बेलपत्र लगायतका धार्मिक तथा वातावरणीय महत्वका बिरुवाहरू रोपिएका छन्। रोपिएका बिरुवाहरूको संरक्षणका लागि घेराबार (बारबेर) समेत गरिएको आयोजकले जनाएको छ।
यसै अवसरमा सडक तथा सार्वजनिक स्थान आसपासका झाडी सफा गर्ने, फोहोर संकलन गर्ने र सरसफाइ अभियान सञ्चालन गरिएको थियो। स्थानीयवासीहरूको उल्लेखनीय सहभागिताले कार्यक्रम थप प्रभावकारी बनेको आयोजकको भनाइ छ।
आयोजकका अनुसार वातावरण संरक्षण, हरियाली प्रवर्द्धन तथा समुदायमा सरसफाइप्रति सचेतना अभिवृद्धि गर्ने उद्देश्यले यस्तो अभियान हरेक १५ दिनमा नियमित रूपमा सञ्चालन हुँदै आएको छ।
आगामी दिनमा रोपिएका बर र पिपलका बिरुवाको फेदीमा चौतारो निर्माण गरी संरक्षण र व्यवस्थापनलाई थप प्रभावकारी बनाउने योजना रहेको समेत आयोजकले जानकारी दिएको छ।
Discussion about this post