लेखनाथ, १७ चैत्र । लेखनाथ जेसीजद्वारा एस.ई.ई. परीक्षा २०८२ मा सहभागी हुने छात्राहरूलाई लक्षित गरी लेखनाथ जेसीजले निःशुल्क सेनेटरी प्याड व्यवस्थापन कार्यक्रम सफलतापूर्वक सम्पन्न गरेको छ । किशोरीहरूको स्वास्थ्य र सरसफाइलाई प्राथमिकता दिँदै आयोजना गरिएको उक्त कार्यक्रमले परीक्षा अवधिमा छात्राहरूलाई सहज वातावरण सिर्जना गर्ने उद्देश्य राखेको थियो।
कार्यक्रम अन्तर्गत लक्ष्मी मा.वि., लक्ष्मी आदर्श मा.वि., गगन मा.वि., बह्मरुपा मा.वि., जनप्रकाश मा.वि., त्रिभुवन शान्ति मा.वि. तथा भवानी कालिका मा.वि. मा निःशुल्क सेनेटरी प्याड व्यवस्थापन गरिएको हो । विद्यालयस्तरमै पुगेर सामग्री वितरण गरिएको यस पहललाई विद्यार्थी, अभिभावक तथा शिक्षकहरूले सकारात्मक रूपमा लिएका छन्।
लेखनाथ जेसीजका अध्यक्ष सर्बिन्द्र न्यौपानेले कार्यक्रममा प्रत्यक्ष तथा अप्रत्यक्ष रूपमा सहयोग, साथ र समर्थन प्रदान गर्ने सम्पूर्ण महानुभावहरू तथा महत्वपूर्ण भूमिका निर्वाह गर्ने विद्यालय परिवारप्रति विशेष आभार व्यक्त गरेका छन्। उनले यस्ता सामाजिक तथा स्वास्थ्य सचेतनामूलक कार्यक्रमहरू आगामी दिनमा समेत निरन्तरता दिइने जानकारी दिएका छन्।
स्थानीय तहमा किशोरी स्वास्थ्यप्रति जनचेतना अभिवृद्धि गर्दै शिक्षा क्षेत्रमा सहयोग पुर्याउने उद्देश्यसहित गरिएको यो कार्यक्रमलाई उदाहरणीय सामाजिक पहलका रूपमा लिइएको छ।
यस वर्षको माध्यमिक शिक्षा परीक्षा (एसईई) बिहीबार देखि सुरु हुँदैछ। राष्ट्रिय परीक्षा बोर्डले परीक्षाको सम्पूर्ण तयारी पूरा भएको जनाएको छ। देशभरका सबै परीक्षा केन्द्रबाट बिहान ८ बजेदेखि एकै समयमा एसईई परीक्षा सुरु हुने छ।
चैत १९ गतेदेखि सुरु भई २९ गतेसम्म चल्ने एसईई परीक्षामा यसवर्ष पाँच लाख १२ हजार ४२१ जना विद्यार्थी सहभागी हुने राष्ट्रिय परीक्षा बोर्ड अन्तर्गतको कक्षा १० का परीक्षा नियन्त्रक टुकराज अधिकारीले जानकारी दिएका छन ।
Discussion about this post