लेखनाथ, ७ चैत्र । एन आई सि एशिया बैंक लेखनाथ शाखाले तनहुँको बेलचौतारास्थित नेपाल प्रहरीको विशेष सुरक्षा गणमा वित्तिय साक्षरता तथा डिजिटल बैंकिङसम्बन्धी अनुशिक्षण कार्यक्रम सम्पन्न गरेको छ ।
‘ग्लोबल मनी वीक २०२६’ को अवसरमा आयोजित कार्यक्रममा ५० भन्दा बढी प्रहरी कर्मचारीहरूको सहभागिता रहेको थियो। कार्यक्रममा स्मार्ट मनी व्यवस्थापन, बचतको महत्व तथा डिजिटल बैंकिङको सुरक्षित प्रयोग सम्बन्धी जानकारी प्रदान गरिएको थियो।
कार्यक्रममा शाखा प्रबन्धक सन्तोष अर्यालले कार्यक्रमको उद्देश्य तथा वित्तीय साक्षरताको महत्वबारे प्रकाश पार्नुका साथै बैंकका विभिन्न बैंकिङ सेवाहरू तथा उत्पादनहरूको बारेमा समेत जानकारी गराएका थिए।
कार्यक्रममा प्रहरी निरीक्षक जनकराज बञ्जाराले बैंकिङ सेवाको आवश्यकता र महत्वबारे मन्तव्य राख्दै कार्यक्रमको समापन गरेका थिए ।
देशको सुरक्षामा निरन्तर खटिने नेपाल प्रहरीसँग आर्थिक सुरक्षासम्बन्धी सन्देश आदान–प्रदान गर्न पाउँदा बैंकले गौरव महसुस गरेको जनाएको छ।
युवामा वित्तीय शिक्षाको महत्वबारे जागरण ल्याउने उद्देश्यले वार्षिकरूपमा विश्वभर मनाइँदै आएको विश्व वित्तीय सप्ताह (ग्लोवल मनी विक) नेपालमा चैत ६ देखि १२ गते (मार्च २०–२६) सम्म मनाइने भएको हो ।
सन् २०१२ देखि हरेक वर्षको मार्च महिनामा मनाउन सुरु गरिएको यो सप्ताह अर्गनाइजेसन अफ इकोनोमिक कोअपरेसन एन्ड डेभलपमेन्ट (ओइसिडी) को संयोजनमा विश्वका धेरै मुलुकमा मनाइँदै आएको छ ।
नेपालमा नेपाल राष्ट्र बैंकको संयोजनमा, बैंक तथा वित्तीय संस्था, सहकारी विभाग तथा सहकारी संस्था, नेपाल बीमा प्राधिकरण, नेपाल धितोपत्र बोर्ड, नेशनल बैंकिङ इन्स्टिच्युट, कर्मचारी सञ्चय कोष, नागरिक लगानी कोषलगायत निकाय तथा संस्थाले यो सप्ताह मनाउनेछन् ।
Discussion about this post