डायमण्ड मा.वि. को त्रिदिवसीय कार्यक्रम: दोस्रो दिन डायमण्ड मेला

पोखरा, २३ माघ । पोखरा–२७, तालचोकस्थित डायमण्ड सेकेन्डरी स्कूलमा “Read Today, Lead Tomorrow” भन्ने मूल नारासहित पठन महोत्सव २०८२, माघ २२गतेबाट सुरु भएको तीन दिने शैक्षिक, साहित्यिक तथा सांस्कृतिक कार्यक्रम सफलतापूर्वक सञ्चालन भइरहेको छ।

तिन दिनसम्म चल्ने यस कार्यक्रमअन्तर्गत पठन महोत्सव, डायमण्ड मेला (Food, Education & Fun) तथा ३८औँ वार्षिक उत्सव समेटिएको छ। पहिलो दिन पठन महोत्सव औपचारिक उद्घाटन समारोहसहित २२  गतेबाट सुरु गरिएको थियो, जहाँ राष्ट्रगान, विद्यालय प्रार्थना, ध्यान, विद्यालय निर्देशकद्वारा स्वागत मन्तव्य तथा प्रमुख अतिथिद्वारा कार्यक्रम उद्घाटन गरिएको थियो। त्यसपछि १० मिनेटको सामूहिक “Read Aloud Session” आयोजना गरिएको थियो। पहिलो दिनको प्रमुख आकर्षणका रूपमा प्रख्यात साहित्यकार डा. नवराज लम्सालको Book Talk Show तथा Panel Discussion सम्पन्न भएको थियो भने शिव त्रिपाठीद्वारा कविता वाचनले कार्यक्रमलाई थप अर्थपूर्ण बनाएको थियो।

नर्सरीदेखि कक्षा ३ सम्मका विद्यार्थीहरूका लागि छुट्टै कार्यक्रम र कक्षा ४ देखि कक्षा १२ सम्मका विद्यार्थीहरूका लागि अर्को कार्यक्रम सञ्चालन गरिएको थियो । कक्षा स्तरअनुसार पुस्तक समीक्षा, कविता वाचन, परियोजना प्रस्तुति, समाचार वाचन, भाषा खेल, समूह वाचन तथा अभिभावक अनुभव आदान–प्रदान जस्ता गतिविधिहरू विद्यालयका विभिन्न स्थानहरूमा Parallel Session मार्फत सञ्चालन गरिएका थिए।

कार्यक्रमको दोस्रो दिन डायमण्ड मेला २०८२ भव्य रूपमा सम्पन्न भएको छ। Food, Education & Fun लाई एकै ठाउँमा समेटिएको मेलामा शैक्षिक, खेलकुद तथा मनोरञ्जनात्मक स्टलहरू राखिएका थिए। मेलाको सभापतित्व हरिप्रसाद लामिछानेले गर्नुभएको थियो भने वाटर फ्रन्ट रिसोर्टका रेसिडेन्ट म्यानेजर अमृत बी. के. प्रमुख अतिथिका रूपमा सहभागी रहनुभएको थियो। स्वागत मन्तव्य विद्यार्थी रितिक गुरुङले राखेका थिए भने कार्यक्रममाथि सञ्जीव थापाले प्रकाश पार्नुभएको थियो।

कार्यक्रम सञ्चालन नारायण वाग्लेले गर्नुभएको थियो। मेलामा सांगीतिक प्रस्तुति अन्तर्गत Glitch Groove ब्यान्डका तर्फबाट ड्रममा सिसन क्षेत्री, गिटारमा आसिम आले र ओस्कार गुरुङ, बासमा रितेन गुरुङ, तथा विशाल पाण्डे लगायतको  लाइभ प्रस्तुति रहेको थियो। यसका साथै Diamond Band र Diamond Girls Bandको प्रस्तुति पनि दर्शकको विशेष आकर्षण बनेको शिक्षक राजन परियारले जानकारी दिनुभयो।

मेलामा कक्षा ११ र १२ का होटल म्यानेजमेन्ट संकायका विद्यार्थीहरूले मम:, चाउमिन, जुजु धौ, नेवारी खाजा, पेस्ट्रीलगायतका परिकारसहितका खाद्य स्टल सञ्चालन गरेका थिए भने विद्यार्थीहरूद्वारा सञ्चालित खेल तथा हस्तकला तथा मनोरञ्जनात्मक स्टलहरूले मेलालाई थप जीवन्त बनाएको थियो। कार्यक्रम संयोजक अर्जुन अधिकारीका अनुसार मेलाबाट करिब ६ लाख ५० हजार रुपैयाँ बराबरको कारोबार भएको छ।

विद्यालयले तेस्रो दिन ३८औँ वार्षिक उत्सव तथा पुरस्कार वितरण समारोह आयोजना गर्ने जनाएको छ। विद्यालय प्रशासनले सबै अभिभावक, शुभेच्छुक तथा समुदायका सदस्यहरूलाई कार्यक्रममा उपस्थित भई विद्यार्थीहरूको उत्साहवर्धन गर्न हार्दिक निमन्त्रणा गरेको छ।