बेगनासतालमा ड्रागन बाेट रेस शुरु

लेखनाथ , ११ चैत्र । युवा तथा खेलकुद मन्त्री विराज भक्त श्रेष्ठले खेलकुदको माध्यमबाट अन्तराष्ट्रिय सम्बन्ध बिस्तार गर्न सहयोग पुग्ने बताए ।

पोखरा महानगरपालिका, नेपाल पर्यटन बोर्डको आयोजना र होटल तथा रेष्टुरेण्ट एशोसियसन लेखनाथ र ड्रागन बोर्ड एशोसियसन गण्डकी प्रदेशको सह आयोजनामा बाट सुरु भएको प्रथम राष्ट्रिय ड्रागन बोट रेसको उद्घाटन कार्यक्रमलाई सम्बोधन गर्दै मन्त्रि श्रेष्ठले खेललाई सांस्कृति, प्राकृतिकको महत्व दिएर झाँकी रयाली सहितको उपस्थितिमा हुने खेलले बेगनासताललाई अन्तराष्ट्रिय क्षेत्रमा चिनाउने विश्वास व्यक्त गरे । आगामी दिनमा खेललाई पर्यटनसँग जोड्नुपर्नेमा जोड दिएका थिए ।

यस्तै गण्डकी प्रदेशका पूर्व मूख्यमन्त्री खगराज अधिकारीले यस लेखनाथ क्षेत्रको सांस्कृतिक, धार्मिक तथा यस क्षेत्रमा रहेका सात तालको विकास गर्नुपर्नेमा जोड दिंदै पोखरामा रहेको फेवाताल जस्तै लेखनाथको क्षेत्रमा रहेका बेगनासताल, रुपाताल, खास्टे, मैदी, गुँदे, न्यूरोनी तालको विकास गर्न चाहेको बताए । लेखनाथको छुट्टै पहिचान भएको बताउँदै विकास निर्माणका हिसाबले लेखनाथ क्षेत्र ओझेलमा परेको स्वीकार गर्दै अधिकारीले यस क्षेत्रका बासिन्दाको भावनालाई आफूले सम्मान गर्ने बताए । प्रथम ड्रागन बोट रेसले महानगरवासी भएको झल्को दिएको बताउँदै अधिकारीले सकारात्मक सोचका साथ राष्ट्रिय अभियान `समृद्ध नेपाल, सुखी नेपाली´ स्वरोजगार र रोजगारी सिर्जना गर्ने अभियानमा सबै नेपालीको मन प्रतिबद्ध हुने विश्वास व्यक्त गरे ।

नेपाल पर्यटन बोर्ड गण्डकीका प्रमुख नविन पोखरेलले पोखरा र लेखनाथमा वाटर स्पाेर्टसको रुपमा विकास गर्नुपर्नेमा जोड दिए। यस्ता कार्यक्रमले पोखरा र लेखनाथका सम्पदालाई चिनाउने बताउँदै यसबाट आर्थिक विकास गराउन सकिन्छ भन्ने धारणालाई मुर्त रुप दिएको बताए ।

पोखरा महानगरका प्रवक्ता मोतिलाल तिमिल्सिनाले यस क्षेत्रमा रहेका तालहरुको संरक्षणका लागि महानगरपालिका योजनावद्ध रुपमा अगाढि बढिरहेको जानकारी दिए । प्रवक्ता तिमिल्सिनाले पहिलो चरणमा खास्टे, न्युरेनी तालको संरक्षणणका लागि डिपीआरको प्रकृयालाई अगाढि बढाउन १० करोड भन्दा बढी परियोजनाको सञ्चालनको क्रममा रहेको बताए । पोखरा महानगरपालिका खेल क्षेत्रको विकासका आवश्यक बजेट विनियोजन गरी पूर्वाधार निर्माणमा समेत योजनाबद्ध रुपमा महानगर लागिपरेको बताए ।

पोखरा महानगरपालिका वडा नं. ३१ का वडा अध्यक्ष ढकनाथ कंडेलले पोखरा र लेखनथामा विशिष्टिकृत रुपमा रहेका ताहरुको संरक्षण गर्न यस कार्यक्रम केसेढुंगा सावित हुने विश्वास व्यक्त गरे ।

नेपाल पर्यटन बोर्डका कार्यकारी सदस्य मदन आचार्यको अध्यक्षतामा सम्पन्न भएको भएको कायक्रमको सञ्चालन होटल तथा रेष्टुरेन्ट एशोसियसनका महासचिव सुरेस लामिछाने र सञ्चारिका समूह गण्डकी प्रदेशकी पूर्व अध्यक्ष स्मिता अधिकारीले गरेका थिए भने होटल तथा रेष्टरेन्ट एशोसियसनका अध्यक्ष बिरभद्र कंडेलले स्वागत गरेका थिए ।

यस अघि बेगनासताल देखि आमा समूहहरु, टोल विकास संस्थाहरु, युवा क्लबहरु लगायत विभिन्न सामाजिक संघ संस्थाहरु आफ्नो जातिय पहिचान सहित भेषभुषा,  पञ्चेबाजा र झाँकी ¥याली सहित कार्यक्रमस्थलमा सहभागी भएको थिए । कार्यक्रममा राष्ट्रिय स्तरका कलाकारहरु प्रजापति पराजुली, जिवन दाहाल, शिवहरी ढुंगाना, सम्झना लामिछाने मगर लगायतले सांस्कृतिक कार्यक्रम प्रस्तुत गरेका थिए ।

आइतबार २ सय मिटरतर्फ १४ टिम विच खेल सम्पन्न भएकाे छ भने साेमबार ५ सय मिटरतर्फका खेल हुनेछन ।प्रतियोगितामा पाँच सय मिटरमा प्रथम हुनेले दुई लाख, द्धितिय हुनेले एक लाख ५० हजार र तृतिय हुनेलाई ७५ हजार र दुई सय मिटरमा प्रथम हुनेलाई एक लाख द्धितियलाई ५० हजार र तृतियलार्ई रु. २५ हजार पुरस्कार प्रदान गरिनेछ ।