हिसान गण्डकी प्रदेश स्तरीय फुटसलको उपाधी त्रिवे
लेखनाथ, ७ फागुन । उच्च शिक्षालय तथा माध्यमिक शिक्षालय संघ (हिसान) गण्डकीको आयोजनामा भएको दोस्रो प्रदेशस्तरीय हिसान प्लस टू तथा युनिभर्सिटि लेबल फुटसल प्रतियोगिताको उपाधि त्रिवेणी पब्लिक स्कूल र पोखरा लिंकन इन्टरनेशनल कलेजले जितेका छन् ।
त्रिवेणी पब्लिकले उपाधि सहित नगद १ लाख, मेडल, ट्रफि जितेको छ । त्यसै गरी उपविजेता स्टेप बाई स्टेपले नगद ५० हजार, मेडल र ट्रफि प्राप्त गरेको छ ।
प्लस टू तर्फ त्रिवेणी पब्लिक स्कूलले स्टेप बाई स्टेप सेकेन्डरी स्कुललाई टाइब्रेकरमा ४–३ गोलले हराउँदै उपाधि चुमेको हो । निर्धारित समयमा ३–३ गोलको बराबरी भएपछि खेल टाइब्रेकरमा पुगको थियो ।
युनिर्भसिटि तह तर्फ पोखरा लिंकन इन्टरनेशनल कलेजले इन्फोम्याट्रिक कलेजलाई टाइब्रेकरमा ४–३ गोलले हरायो । निर्धारित समयमा २–२ गोलको बराबरी भएपछि खेल टाइब्रेकरमा पुगेको थियो ।
उपाधि सहित पोखरा लिंकन इन्टरनेशनल कलेजले नगद २० हजार मेडल र ट्रफि हात पार्दा इन्फोम्याट्रिक कलेजले नगद १० हजार मेडल र ट्रफिमा चित्त बुझायो । प्रतियोगितामा ८ वटा टिमले भाग लिएका थिए ।
प्रतियोगितामा कास्कीका १२ र अन्य जिल्लका ३ विद्यालय गरेर १५ विद्यालयले प्रतियोगिता भाग लिएका थिए । हिसान गण्डकीको सदस्य विद्यालय बीच भएको प्रतियोगितामा कक्षा ११ र १२ मा अध्ययनरत विद्यार्थीहरुले सहभागीता जनाएका थिए ।
कार्यक्रममा गण्डकी युनिभर्सिटिका कुलपति गणेशमान गुरुङ, राष्ट्रिय खेलकुद परिषद्का पुर्व सदस्यसचिव रमेश सिलवाल, उच्च शिक्षालय तथा माध्यमिक शिक्षालय संघ (हिसान) केन्द्रिय सल्लाहकार सूर्य बहादुर जिसि, हिसान गण्डकीका अध्यक्ष रमाकान्त बराल, सबिन मेमोरीयल फुटबल क्लबका अध्यक्ष सञ्जय लिगल, प्रतियोगिता संयोजक सन्तोष पराजुली लगायतले पुरस्कार वितरण गरे ।
Discussion about this post