सचिन रानाभाट
लेखनाथ, मंसिर २६
लेखनाथ, पोखरा, तनहुँ तथा लम्जुङ्गको सिमाना देखि गाउँ घरका सडक किनार तथा बिजुलीका पोलहरुमा पहेँलो कपडामा रातो रंगले “लेखनाथ महोत्सव” लेखेको देखेपछी लेखनाथमा महोत्सव सुरु हुँदैछ भनेर सहजै अनुमान गर्न सकिन्थ्यो। किनकी त्यो बिल्कुलै नयाँ र फरक शैलिको प्रचार शैली थियो र आज सम्म पनि निरन्तर नै रहेको छ।
लेखनाथ उद्योग वाणिज्य संघले बि सं २०५८ सालमा सुन्तला प्रदर्शनी गरेर महोत्सवको सुरुवात गरेको थियो। बि सं २०६० साल देखि लेखनाथ १ भण्डारढिकमा ‘लेखनाथ महोत्सव’ को आयोजना गर्दै त्यसलाई निरन्तरता दिदैं अहिले १९ औं संस्करण सम्म आईपुगेको छ।
तत्कालिन महोत्सवहरुको प्रचार प्रसार गर्न माईकिङ्ग पर्चा तथा कपडा ब्यानरमा लेखेर प्रचार गर्ने चलन हुन्थ्यो। संघले प्रचार प्रसार शैली परिवर्तन संगै पहेँलो व्यानरको शुरूवात भने बि सं २०६२ साल देखि गरेको हो। त्यस समय अघि निलो व्यानरमा सेतो तथा रातो व्यानरमा सेतो रंगको प्रयोग गरेर प्रचार प्रसार गरेको संघका पुर्व अध्यक्ष लक्ष्मी प्रसाद त्रिपाठी वताउँछन ।
उनि भन्छन् – त्यो बेला कर्माचार्य ग्रुपको ‘कोसेली’ तेल निकै चर्चित थियो, उसको पहेँलो रंगको व्यानर बाट उत्प्रेरित हुँदै लेखनाथ महोत्सवले सैनिक आर्ट्स बाट पहेँलो ब्यानरमा स्क्रिन प्रिन्टको माध्यमबाट प्रचार प्रसार शुरु गरेको हो । आजको मिति सम्म आईपुग्दा पोखरा लगायत देशका अन्य मेला महोत्सवहरुले उक्त प्रचार शैली अपनाएको त्रिपाठी वताउँछन ।
स्थानीयहरु भन्छन केही बर्ष पहिले हातमा फोन अनि ईन्टरनेटको सुबिधा थिएन, नजिकै भएपनी मेला महोत्सव बारे जानकारी लिन रेडियो सुन्ने तथा पत्रपत्रिका हेर्नुपर्दथ्यो, त्यो सबैको पहुँचमा थिएन। सामान्यतया मुख्य चाडवाड सकेपछी महोत्सवहरुको सिजन हुन्थ्यो। हामीले महोत्सव हुँदैछ भनेर त्यो पहेँलो कपडामा रातो अक्षरले लेखेको ब्यानर टाँगिएको देखेर सजिलै ठम्याउन सक्थ्यौं ।
“महोत्सव लेखनाथको संस्कृति, स्थानीय उत्पादन बिकास र समृद्धि“ भन्ने नाराका साथ १९ औं संस्करणको लेखनाथ महोत्सव यहि पौष ५ गते देखि १६ गरे सम्म पोखरा २७ डांडाकोनाकमा हुँदैछ ।
Discussion about this post