तनहुँका नौ सडक मानवको उद्धार

दुलेगौडा । सडकमा जीवन विताउने तनहुँको नौ जना बेवारिसे ब्यक्तिहरुलाई मानव सेवा आश्रम कास्कीले उद्धार गरेको छ । लामो समयदेखि सडकमा मागेर जीवन गुजार गर्दै आएको शुक्लागण्डकी नगरपालिकाका तीन महिला सहित एक पुरुष तथा ब्यास नगरपालिकाको दमौलीबाट पाँच जना पुरुषलाई उद्धार गरिएको हो ।

सडक मानव मुक्त बनाउने अभियान अन्तर्गत मानव सेवा आश्रमले उनीहरुलाई शुक्रबार र शनिबार दुई दिनमा उद्धारा गरेको आश्रमका कास्की संयोजक राजन सापकोटाले जानकारी दिनुभयो । सापकोटाले आश्रमको अगुवाईमा मेचि—महाकालि सडक मानव मुक्त सडक बनाउने अभियान चलिरहेको बताउनुभयो ।

एद्धार गरिएका शुक्लागण्डकीका दुई महिला र एक पुरुष मिलडाडा स्थित सडक छेउमा छाप्रो निर्माण गरेर बसेका थिए । उनीहरुले बजार क्षेत्रमा मागेर जीवन गुजारा गर्ने गरेका थिए । यस्तै हिमा भनिने एक महिला समेत बजार क्षेत्रमा दिनमा मागेर खाने र रातको समयमा घरको बाहिर बरण्डामा सुतेर रात विताउदै आएकी थिइन् ।

ब्यास नगरपालिकाका तीन पुरुष सहित एक बालक र एक बृद्धा भने दमौलीको एक प्रतिक्षालयमा बस्ने गरेका थिए । उनीहरुलाईलाई पोखरा स्थित छोरेपाटनमा रहेको मानव सेवा आश्रममा आश्रय दिने बताइएको छ ।

कास्की जिल्ला संयोजक सापकोटा आफूहरुले डिसु नेपाल र स्थानीय तहको समन्वयमा मानव मुक्त सडक अभियान सञ्चालन गरहेको जानकारी दिनुभयो । उहाँका अनुसार यो अभियान पौष ७ देखि जारि रहेको छ भने आगामी माघ ७ गते सकिने छ ।

विसं ०६९ सालमा हेटौडाबाट शुरु गरेको यो सामाजिक संस्थाले अहिले देशका पन्ध्र वटा जिल्लामा कार्यालय स्थापना गरी काम गर्दै आएको छ । कास्कीमा तीन बर्ष अघि देखि काम गर्दै सस्थाले गण्डकी प्रदेशभित्र गोरखा,लमजुङ,बाग्लुङ र कास्कीमा कार्यालय स्थापना गरेर बेवारिसे मानिसहरुको उद्दार गर्दै आएको छ ।

आश्रमले दिएको जानकारी अनुसार बाग्लुङमा ४५, गोरखामा ४५ र लमजुङमा २० बेवारिसे व्यक्तिहरु रहेका छन् । गोरखामा भने पढ्ने किसिमका बालबालिकाहरुको मात्रै उद्दार गरेर राखिएको छ ।

यसरी उद्दार गरिएका व्यक्तिहरुको स्वास्थ्य उपचार, खाना र बस्नको लागि पब्लिक डोनेसन र नेपाल सरकारको केही आर्थिक सहयोग हुने गरेको प्रदेश संयोजक होमनाथ तिमिल्सेनाले जानकारी दिनुभयो । करिब ८० प्रतिशत सहयोग विभिन्न संघसंस्था, क्लब र व्यक्तिले गर्ने गरेका छन् । तिमिल्सेनाल भने ‘गतबर्ष देखि नेपाल सरकारले पनि सहयोग गर्न थालेपछि कामकाज गर्न सहज भएको छ ।’

गतबर्ष चार व्यक्तिहरुको उद्दार गरी करिब दुई जनालाई परिवारमा पुनमिलन गराइएको बताउनुभयो । यसरी उद्दार गरी ल्याइएका व्यक्ति मध्ये ३५ जनाको मृत्यु भैसकेको जिल्ला संयोजक सापकोटाले बताए ।

शुक्लागण्डकी नगरपालिकाबाट सडक मानवहरुलाई आश्रममा पठाउदै इलाका प्रहरी कार्यालय बेलचोताराका जगदिश रेग्मीले सडक दुर्घटनाको जोखिम कम भएको बताउनुभयो । उद्दार पश्चात उनीहरुलाई खाना र बस्नमा समेत सहज हुनेछ ।