म्याग्दे आलुमा आत्मनिर्भर

हरि खरेल/दुलेगौडा । तनहुँको म्याग्दे गाउँपालिका आलुमा आत्मनिर्भर बन्दै गएको छ । विगतका बर्षहरुमा बाहिरी जिल्ला तथा देशहरुबाट आयात गरिदै आएता पनि हाल गाउँपालिका आलुमा आफैमा आत्मनिर्भर बन्न थालेको हो । आलु उत्पादनमा आत्मनिर्भर बन्दै गएसंगै गाउँपालिकाका किसानहरुले आलु खेतिलाई आम्दानीको स्रोतका रुपमा लिन थालेका छन् ।

गाउँपालिका भित्र रहेका सबै वडाहरुमा आलु उत्पादन राम्रो हुने गरेको गाउँपालिकाकी अध्यक्ष माया देवी राना आलेले जानकारी दिनुभयो । आलु उत्पादन राम्रो भए पनि गाउँपालिकामा “कोल्ड स्टोर” नहुँदा पोखरा लाने ल्याउने गर्नुपरेको बताउनुभयो । “हामीलाई कोल्ड स्टोरको समस्या छ ।” उहाँले भन्नुभयो ,“सानो तिनो रकमले नबन्दो रहेछ, प्रदेश सरकारसंग अपिल गरेका छौ ।”

आलुलाई पोखराको कोल्ड स्टोरमा लाने र ल्याउने भाडा तिर्दा आफुले उत्पादन आलु आफैले किनेर खाए जस्तो भएको अध्यक्ष रानाले बताउनुभयो । गाउँपालिकामा उत्पादित आलु गाउँपालिकाकै लागि खपत हुने र बढी भएका आलुलाई पोखरा लाने गरेको जानकारी दिनुभयो । २०७४ सालदेखी नै गाउँपालिकालाई आलुमा आत्मनिर्भर गाउँपालिकाको रुपमा स्थापित गरेको बताउनुभयो । सोही अनुसार कृषकहरुलाई बिउ, मल लगायत आलु उत्पादनका लागि आवश्यक पर्ने बस्तुहरुमा गाउँपालिकाले उपलब्ध गर्ने गरेको जानकारी दिनुभयो ।

यस बर्ष पनि गाउँपालिकाले आलु खेति गर्ने किसानहरुलाई अनुदान स्वरुप आलुका विउ बितरण गरिएको छ । गाउँपालिका भरी नै २० हजार ५ सय केजि निलो आलु (एम.एस–४२ नामक आलुको प्रजाति) बितरण गरिएको कृषि शाखा विज्ञ आरति ढुङ्गानाले जानकारी दिनुभयो । यस बर्ष गाउपालिकाले १ सय ५० टन आलु उत्पादन गर्ने लक्ष्य लिएको छ ।

गाउँपालिकाले अहिले करिब २५० रोपनि क्षेत्रफलमा आलु खेति गरेकोे छ । वडा–वडाहरुबाट आलुको माग टिपोट गरेर ल्याउने र सोही अनुरुप गाउपालिकाले वडामा उपल्ब्ध गराई दिने गरेको छ । जुन आलु वडाले किसानहरुलाई वितरण गर्ने गर्दछ । नगर र कृषकको ५०/५० प्रतिशत लगानिमा अनुदान स्वरुप आलुका विउ वितरण गरेको गाउपालिकाले जनाएको छ ।

गत बर्ष गाउँपालिकाले गाउँपालिकाले १ सय ८० रोपनि क्षेत्रफमा करिब सय टन बराबरको आलु उत्पादन गरिएको कृषि विज्ञ ढुङ्गगानाले बताउनुभयो । गत बर्ष उत्पादनमा तुसारो र पानीका कारणले खासै राम्रो उत्पादन नभएको उहाँले जानकारी दिनुभयो ।