काठमाडौं : प्रमुख प्रतिपक्षी दल नेपाली कांग्रेसले पदाधिकारी बैठक आह्वान गरेको छ। पुल उद्घाटन विषयमा विवाद हुँदा कांग्रेसका वरिष्ठ नेता रामचन्द्र पौडेललाई तनहुँमा प्रहरीले धरपकड गरेकोबारे छलफल गर्न देउवाले आज पदाधिकारी बैठक डाकेका पार्टी मुख्यसचिव कृष्णप्रसाद पौडेलले जानकारी दिए। बैठक सभापति देउवाको निवास बूढानीलकण्ठमा बस्नेछ।
‘बैठक २ बजे बस्ने तय भएको छ, सभापतिज्यूले वर्तमान पदाधिकारी, पूर्व पदाधिकारी सबैलाई बैठकमा आउन भन्नुभएको छ,’ पौडेलले भने, ‘रामचन्द्र दाइ पनि आजै तनहुँबाट काठमाडौं आउने कार्यक्रम छ, बैठकमा तनहुँमा प्रशासनले गरेको ज्यादतीबारे गम्भीर छलफल हुनेछ, कांग्रेसले सरकारको रवैयाबारे नयाँ रणनीति बनाउनेछ।’
तनहुँको बुल्दी खोला पुल उद्घाटन गर्न पुगेको पौडेललाई नेकपाका कार्यकर्ताले बुधबार अवरोध गरेका थिए। कांग्रेस र नेकपा कार्यकर्ताको विवादले उग्ररूप लिन लागेको भन्दै प्रशासनले निषेधाज्ञा नै जारी गरेको थियो। निषेधाज्ञाबीच पुल उद्घाटन गर्न गएका पौडेललाई प्रहरीले नियन्त्रणमा लिएर तीन घण्टा हिरासतमा राखेको थियो।
बुल्दी खोला पुल निर्माण सम्पन्न भएको २ वर्षपछि बिहीबार उनै पौडेलले उद्घाटन गरे। नेकपा र कांग्रेसबीच कसले उद्घाटन गर्ने भन्नेबारे विवाद हुँदा निर्माण सम्पन्न भइसक्दा पनि यो पुल उद्घाटन गरिएको थिएन।
बिहीबार तनहुँमा कांग्रेसले शक्ति प्रदर्शन गरी पौडेलबाटै पुल उद्घाटन गरायो। उक्त कार्यक्रममा कांग्रेस केन्द्रीय सदस्यहरु कांग्रेस केन्द्रीय सदस्यहरू शंकर भण्डारी, प्रदीप पौडेल, गोविन्द भट्टराईलगायत प्रदेशका संसदीय दलका नेता अन्य प्रदेशसभा सदस्य तथा नेता कार्यकर्ताको सहभागिता थियो।
Discussion about this post