अशोक विश्वकर्मा / तनहुँ । भिमाद नगरपालिका र शुक्लागडी नगरपालिकालाई जोड्ने गरि भागर दोभानमा मोटरेवल पुल बन्न सुरु भएको झण्डै ४ बर्ष भयो । अझै पनि पुल निर्माण पुरा हुन भने सकेको छैन । बर्षाै अघि देखि निर्माणाधिन रहेको पुल नबनेपछि नजिकै रहेको झुलुङ्गे पुलबाट नै मोटरसाइकल तार्नुुपर्ने बाध्यता सेती नदी पारिका बासिन्दाले भोग्दै आएका छन् ।
नदी वारपार गर्न मानिसका लागि मात्र उपयुक्त हुने झोलुङ्गे पुलबाट मोटर साइकल तार्नेहरुले नजिकै रहेको पक्की पुलबाट ओहोरदोहोर गर्ने सपना देखेका छन् । छिट्टै पक्की पुलबाट सवारी सहित वारपार गर्ने सपना देखेकाहरुको दैनिकी भने निर्माणधिन पक्की पुल हेर्दै झोलुङ्गे पुल तरेरनै वित्ने गरेको छ ।
त्यसो त यो पुलबाट मोटरसाइलक तार्नको लागि जो कोहीले हिम्मत नै राख्दैन् । मोटर साइकल कुदाउँदा हल्लने पुल, तल देखिने नदीको रह र पारि भित्ताको अफ्ट्यारो घुम्ती यहाँ दैनिक हुने दुर्घटनाको कारण हो । पुल नजिकै घर भएका दिपक आले पुलको यात्रा गर्ने सवारी धनिको उद्दारमा सयौँ पटक खटिनुभएको छ । “रातको बेलामा एक्लै हुन्छन्, सहयोगका लागि आउने कोही नभएपछि बोलाछन् जादै प¥यो”आलेले भन्नुभयो “अर्काे पुलि बने त आनन्दै हुन्थ्यो ।”
भिमाद नगरपालिका ८ भागरका लोकबहादुर रानाले यही पुलबाट मोटर साइकल चढेर वारपार गरेको बर्षाै भयो । उहाँपनि उहि पक्कि पुल कहिले बन्छ होला भन्दै र त्यही झोलुङ्गे पुल तर्ने मध्येका एक हुनुहुन्छ । “अरु बेला त ठिकै हो पुलमा मानिसको ओहोर दोहोर र सिमसिमे पानी आएको बेला साह्रै गाह्रो हुन्छ, रुवाउनु रुवाउछ चिप्लो भएर ।”उहाँले भन्नुभयो । “पुल कहिले बन्छ भनेर अस्ति सोध्न पनि गएँ, एक—दुई जनाले मात्र अलि अलि काम गरेको छ, यस्तो पाराले कहाँ पुल बन्छ ?, हामी जनताको आँखामा धुलो हालिराको छ काम गरेको छ है भन्ने त भाको छ ।”
पटक पटक झोलुङ्गे पुलमा मोटर साइकल पल्टने समस्याको साँच्ची हुनुहुन्छ, भागरकै स्थानीय बृद्ध विष्णुबहादुर आले(काइला बाजे) । दिनभर पुलमा नजिकै हुने बृद्धहरुको भेलाले दैनिकजस्तो दुर्घटनाको दृश्य देख्नु सामान्य भईसकेको छ । “हिजो पनि एक जना लड्यो, यहाँका दिनदिन लड्छन् ।” आलेले भन्नुभयो ।
यता सडक डिभिजन कार्यालय दमौलीका सुचना अधिकारी ईन्जिनियर सचिन श्रेष्ठले पुलको काममा निर्माण कार्य ढिलाई भएको बताउनुभयो । “हामीले पटक पटक भनेका छौँ, तर पनि कामको गति भने सुस्त भएकै हो ।” श्रेष्ठले भन्नुभयो । उहाँले पुलको लागि आवश्यक पर्ने ४ फाउण्डेशन मध्ये तीन वटा फाउण्डेशन निर्माण भएको र अव एउटा फाउण्डेशन निर्माणका लागि काम अघि बढेको जनाउनुभयो ।
आगामी बर्षको चैत १५ गतेसम्म निर्माण सम्झौता गर्ने सहमति भएता पनि एक आर्थिक बर्ष समय थप गर्ने पाउने प्रावधानका कारण २०७७ फागुन मसान्तसम्ममा पुल निर्माण हुने इन्जिनियर श्रेष्ठले जनाउनुभयो । उनले भिमाद र शुक्लागण्डकी जोड्ने दोभानको पुल सहित जिल्लामा ९ वटा पुल निर्माणाधिन रहेको समेत जानकारी दिनुभएको छ ।
एडभेन्चर कन्ट्रक्सनलाई ८ करोड ८० लाख ५० हजार ८ सय ८३ रुपैयामा निर्माण गर्ने सम्झौता भएता पनि पछि लागत संशोधन गरि पुल निर्माणका लागि १० करोड १ लाख ५० हजार ५ सय ९३ रुपैयाँ पुगेको छ । पुल १ सय ५ मिटर लामो रहेको छ ।
Discussion about this post