कात्तिक ७ काठमाण्डौँ । कांग्रेस सभापति शेरबहादुर देउवाले कोरोना संक्रमित नागरिकले आफ्नै खर्चमा उपचार गर्नुपर्ने भनी सरकारले गरेको निर्णय लज्जास्पद भएको बताएका छन्। बिहीबार प्रेस विज्ञप्ति जारी गर्दै सभापति देउवाले सो निर्णयले सरकार जनताप्रति संवेदनहीन, गैरजिम्मेवार, कर्तव्यविमुख छ भन्ने देखिएको बताए।
स्वास्थ्य मन्त्रालयले केही दिनअघि कोरोना संक्रमित नागरिकले आफैं उपचार गर्नुपर्ने निर्णय गरेको थियो। सभापति देउवाले नेपालको संविधानले प्रत्येक नागरिकलाई आधारभूत स्वास्थ्य सेवा निस्शुल्क प्राप्त गर्ने अधिकार प्रत्याभूत गरेको बताएका छन्।
‘सरकारले कुनै शर्तबिना यसको कार्यान्वयन गर्नुपर्छ,’ सभापति देउवाले भनेका छन्, ‘सरकारले जनताको हितविरूद्ध लोकतान्त्रिक मूल्य, संवैधानिक र कानुनी व्यवस्था विपरीत निर्णय गरेर अलोकतान्त्रिक चरित्र प्रदर्शन गरेको छ। यस्तो स्थिति आउन नदिन म प्रधानमन्त्रीजीलाई सजग गराउन चाहन्छु।’
कोभिड(१९ नियन्त्रणको सन्दर्भ सरकार प्रारम्भदेखि गैरजिम्मेवार रहेको उनले बताएका छन्। ‘समयमा आवश्यक सामग्रीको आपूर्ति नगर्नु, परीक्षण, क्वारेन्टिन, आइसोलेसन सेन्टर, प्रयोगशाला, अस्पतालको व्यवस्थापन र विदेशमा रहेका नेपालीलाई इज्जतपूर्व घर फिर्तीमा उदासिन नहुनु, व्यापक भ्रष्टाचार गर्नु सरकारको कुशासन, बेथिति र असफलताका उदाहरण हुन्,’ विज्ञप्तिमा भनिएको छ, ‘महामारीको भयावह अवस्था सिर्जना हुनुमा नेपाल कम्युनिष्ट पार्टीको वर्तमान सरकार जिम्मेवार छ।’
देउवाले कालोबजारी, महंगी, मिसावट, कृत्रिम अभाव, भ्रष्टाचार र बेथिति उग्ररुपले प्रकट भएको समेत बताएका छन्। ‘आर्थिक अपारदर्शीता, अनुशासन र मितव्ययीता छैन, अनावश्यक काममा सरकारी ढुकुटी खर्च भएको छ,’ उनले भने, ‘तर, नागरिकको स्वास्थ्यबारे सरकार असंवेदनशील बनेको छ।’
देउवाले प्रधानमन्त्रीलाई कोभिडको परीक्षण र संक्रमित नागरिकले आफ्नो खर्चमा उपचार गर्ने भनी गरेको निर्णय तत्काल खारेज गर्न अनुरोध पनि गरेका छन्।
Discussion about this post