लेखनाथ, २९ कार्तिक । पोखरा महानगरपालिका–३२ लामेआहालमा रहेको राधाकृष्ण वृद्धाश्रम सञ्चालक समितिको १३ औँ साधारण सभा सम्पन्न भएको छ । समाजसेवा, मानवता र जेष्ठ नागरिकको सम्मानलाई केन्द्रमा राखेर कार्यरत यस संस्थाले आफ्ना गतिविधि, उपलब्धि र आगामी योजनाहरू सार्वजनिक गर्दै साधारण सभा सम्पन्न गरेको हो ।
कार्यक्रमको उद्घाटन गर्दै पोखरा महानगरपालिका वडा नंं ३२ का वडा अध्यक्ष अक्कलबहादुर कार्कीले वृद्धाश्रमलाई स्थानीय सरकारको निरन्तर साथ रहने प्रतिबद्धता व्यक्त गर्दै वृद्धाश्रममा जेष्ठ नागरिकको दुख–सुख साटासाट गर्ने थलो भएकाले यहाँ स्वस्थ, शान्त र आत्मीय वातावरण उपलब्ध गराउनु अहिलेको आवश्यकता हो उनको भनाई थियो ।
सोही अवसरमा लेखनाथ उद्योग वाणिज्य संघकी अध्यक्ष जानुका अधिकारी पराजुलीले जेष्ठ नागरिकको अनुभव, ज्ञान र संस्कारका धनी भएको भन्दै उनीहरूकै अनुभवमा समाज अघि बढ्ने बताउदै “जेष्ठ नागरिक हाम्रो घरका दिशानिर्देशक मात्र होइनन्, समाजका संस्कार र संस्कृतिका आधार स्तम्भ भएको समेत वताइन ।”
कार्यक्रममा सिड फाउन्डेसन कास्कीका निर्देशक दामोदरभक्त थापाले संस्थाको प्रारम्भिक अवस्थादेखि हालसम्मको यात्रामा धेरै उतारचढाव आए पनि समर्पण, सेवा–भावना र सामुदायिक सहयोगमा भरपर्दै संस्थाले महत्वपूर्ण प्रगति गरेको बताए । उनले १३ वर्षअघि खुला आकाशमुनिबाट सुरु भएको आश्रमले आज “साझा घर” को रूप लिइसकेकोमा जोड दिए । साथै उनले आश्रमसँग सम्बन्धित राधाकृष्ण मन्दिर, भजन समूह र गुरुकुल विद्याश्रमलाई एकीकृत विकास गर्नुपर्ने समय आएकाले “हामी सबैको एउटा हातले मात्र सम्भव हुँदैन । धेरैका हात मिलेर मात्रै ‘राधाकृष्ण परिवार’ अझ सक्षम र आत्मनिर्भर बन्न सक्नु पर्छ उनको सुझाव थियो।”
आश्रमका प्रथम उपाध्यक्ष शोभामोहन पौडेलले स्वागत मन्तव्य राख्दै संस्थाको यात्रा, उद्देश्य र सेवाप्रवाहलाई निरन्तर सुधार गर्दै लैजाने प्रतिवद्धता व्यक्त गरे । साथै उनले “हामी सबैजना आज होइन भोलि यही अवस्थामा पुग्छौँ। त्यसैले वृद्ध सेवा कुनै दया होइन, हाम्रो कर्तव्य हो” उनको भनाई रहेको थियो ।
Discussion about this post