लेखनाथ, १० असोज । पछिल्लो समय प्रहरी क्षेत्रमा जिम्मेवारी हेरफेर भईरहेका अवस्थामा कास्कीको इलाका प्रहरी कार्यालय डाँडाकोनाकको जिम्मेवारी समाल्न प्रहरी नायव उपरीक्षक (डीएसपी) गुणराज बुढाथोकी आएका छन् ।
यसै विच शनिवार एक कार्यक्रम मार्फत डीएसपी बुढाथोकीले चाडपर्वको समयमा समाजमा शान्ति–सुरक्षा कायम गर्न सुरक्षा निकाय र सञ्चारकर्मी दुवैको महत्त्वपूर्ण भूमिका रहेको बताउँदै सूचना छिटो प्रवाह गर्ने र २४ सै घण्टा जनतामा सुरक्षा प्रत्याभूति दिलाउने प्रतिवद्धता व्यक्त गरे । फरार कैदी–बन्दीसम्बन्धी संवेदनशील विषयमा गोपनीयता कायम राख्दै तथ्यगत सूचना उपलब्ध गराउदै जाने विश्वास दिलाएका थिए ।
दशैं र तिहारलाई लक्षित गरी चारवटा मोबाइल टोली गठन गरिएको र २४ सै घण्टा प्रहरी सतर्क रहि जनतालाई सुरक्षा प्रदान गर्ने जानकारी दिए । साथै जिल्ला प्रहरी कार्यालय कास्कीले हालै सार्वजनिक गरेको “चाडपर्व विशेष सुरक्षा योजना २०८२” अनुसार चोरी, डकैती, लुटपाट, लागूपदार्थ दुरुपयोग, जुवा–तास जस्ता गतिविधि नियन्त्रण गर्न सवारी साधन चेकजाँच, यात्रुलाई सहयोग, बढी भाडा असुल्ने सवारीसाधन कारबाही, पैदल गस्ती, ग्रामीण गस्ती, बजार अनुगमन, सादा पोशाकमा प्रहरी परिचालन लगायतका गतिविधि सञ्चालन भइरहेको जानकारी दिए ।
जिल्लाभर नौ सय २३ जना प्रहरी परिचालन गरिएको जनाउँदै डीएसपी बुढाथोकीले यस क्षेत्रमा चारवटा मोवाइल टोली परिचालन समेत गरेको र प्रहरी सेवामा पारदर्शिता, जवाफदेहिता र समुदायसँगको सहकार्यलाई प्राथमिकतामा राखिने विश्वास दिलाएका थिए ।
Discussion about this post