कालिका सामुदायीक सेवा केन्द्रद्धारा पोखरा–२८ चुत्रकोटमा सरसफाई

लेखनाथ, २४ चैत्र । कालिका सामुदायिक सेवा केन्द्र एवं सामुदायिक प्रहरी सेवाको आयोजनामा पोखरा–२८ काउलेडाँडा चुत्रकोटमा सरसफाई कार्यक्रम सम्पन्न भएको छ ।

प्राकृतिक सुन्दरताले भरिपुर्ण भएको र रमणीय दृश्यहरुको अवलोकनको लागी उपयुक्त स्थान भएकाले त्यहाँ घुम्न आउने आन्तरीक पर्यटकहरुको संख्या वढेसँगै फोेहोर पनि वढ्न थालेपछि सरसफाई कार्यक्रमको आयोजना गरिएको सेवा केन्द्रका अध्यक्ष प्रविन नेपालीले जानकारी दिए ।

कार्यक्रममा पोखरा महानगरपालिका वडा नं. २८ का वडाध्यक्ष श्रीकृष्ण लामिछानेले विगतदेखी नै पर्यटकिय क्षेत्रको रुपमा चर्चित यस ठाउँमा पर्यटकिय पुर्वाधारहरुको विकास हुन नसकेकाले ओझेलमा परेको वताउँदै यसलाई सफा र स्वच्छ राख्ने जिम्मेवारी सबैको भएको वताए ।

वडाध्यक्ष लामिछानेले यस क्षेत्रमा पदमार्गको विकास गर्ने वडाको योजना रहेको र नेपालकै ठूलो १ सय ८ फिट अग्लो अर्धनारीश्वर महादेवको मूर्ति स्थापना गरि धामको रुपमा विकास गर्ने गुरुयोजना बनेको हुँदा यस प्रकारका पर्यटनका पूर्वाधार निर्माणले धार्मिक पर्यटकिय क्षेत्रको रुपमा विकास हुने र यस क्षेत्रकै आर्थिक समृद्धिमा टेवा पुग्ने विश्वास व्यक्त गरे ।

सामुदायीक प्रहरी सेवा जिल्ला समन्वय समिति कास्कीकी प्रथम उपाध्यक्ष विष्णु सुवेदी भण्डारीले सरसफाई गर्नुभन्दा पनि राम्रो फोहोर नगर्नु हुने वताउँदै यस्तो कार्य कुनै एक दुई संस्था र स्थानिय सरकारले चाहेर मात्र नहुने सम्र्पुण नागरिक सचेत हुनुपर्ने वताईन ।

यस्तै हाम्रो आरुपाटा टोल विकास संस्थाका अध्यक्ष वेदनाथ अधिकारीले विगतमा विदेशी पर्यटकहरुले भरिभराउ हुने पर्यटकिय ठाउँ भएको र अहिले पनि आन्तरीक पर्यटकहरुको संख्या वढ्दै जाँदा फोहोर व्यवस्थापन सँगै विभिन्न विकृति विसंगती पनि मौलाउँदै गएको गुनासो गरे ।

सरसफाई कार्यक्रममा विभिन्न संघ संस्थाहरु, आमा समुह, युवा क्लव, राजनितिक दलका प्रतिनिधिहरु, आरुपाटा युथ टिमका युवाहरु लगायत स्थानियहरुको सहभागिता रहेको थियो ।