फागुन ७, लेखनाथ –
कास्कीको पूर्वी भाग अर्थात वेगनास, रुपा लगायत लाई केन्द्रबिन्दुमा राखेर फोटो भिडियो मार्फत स्थानिय तथा बाह्य पर्यटन प्रवर्द्धनमा अग्रणी भुमिका खेल्दै आएको संजिव फिल्म्सले पोखरा भ्रमण वर्ष २०२५ लाई प्रवर्द्धन गर्न नि:शुल्क स्वयंसेवी सहयोग गर्ने भएको छ।
फिल्म्सका संचालक समेत रहेका संजिव घिमिरेका अनुसार पोखराका सुन्दर ताल, पहाड र सांस्कृतिक स्थलहरूको फोटो र भिडियो सामग्री तयार गर्दै, सामाजिक सञ्जाल प्लेटफर्म जस्तै वेबसाईट, फेसबुक, ईन्स्टाग्राम, टिकटक लगायतमा प्रकाशन/प्रसारण गर्नेछ।
उक्त फोटो, भिडियो निर्माण, प्रकाशन तथा प्रसारण सबै नि: शुल्क गर्ने भएको हो।
फिल्म्सले यस अघि नै पोखरा र लेखनाथ क्षेत्रको प्रवर्द्धन गर्दै आएको छ र अब यस अभियानमार्फत थप प्राकृतिक र ऐतिहासिक गन्तव्यहरूको प्रचार प्रसार गर्ने उदेश्य राखिएको संचालक घिमिरेले जानकारी दिएका छन्।
भ्रमण वर्षको अवधिमा पोखरामा स्वदेशी र विदेशी गरी २० लाख पर्यटक भित्र्याउने लक्ष्य लिइएको पोखरा महानगरपालिकाका प्रमुख धनराज आचार्यले जानकारी दिए । पोखराको अर्थतन्त्रलाई चलायमान बनाउँदै यो वर्षलाई आधार वर्षका रूपमा लिने, नयाँ पर्यटकीय गन्तव्यको खोजी गरी कम्तीमा एक वडा एक पर्यटकीय गन्तव्य स्थापित गर्ने, स्वदेशका पाँच र विदेशका पाँच गरी १० सहरसँग भगिनी सम्बन्ध कायम गर्ने, पोखरामा लगानी टुरिजम इन्भेस्मेन्ट समिट आयोजना गर्ने, राष्ट्रिय तथा अन्तर्राष्ट्रिय संघ–संस्थालाई पोखरामा बैठक, इभेन्ट तथा भ्रमणका लागि अनुरोध गर्ने, पोखरा अन्तर्राष्ट्रिय विमानस्थलबाट विदेशका विभिन्न सहरसँग सीधा उडानका लागि सम्पर्क र समन्वय गर्ने, सार्वजनिक यातायातलाई थप व्यवस्थित गर्ने महानगरको लक्ष्य छ ।
Discussion about this post