राज्यले सहिद घोषणा नगरेका ऋषि परियारको सालिक अनावरण

लेखनाथ,१६ माघ । राज्यले सहिद घोषणा नगरेका ऋषि परियारको शहादतको ३४ वर्ष पश्चात जनस्तरबाट शालिक निर्माण गरिएको छ ।
पञ्चायत विरुद्धको संयुक्त जनआन्दोलनको क्रममा २०४६÷४७ क्रममा कास्कीको जिल्ला पञ्चायत अगाडी सहिदचोकमा सुरक्षा फौजको गोलीबाट वि स २०४७ वैशाख १७ शहादत प्राप्त गरेका पोखरा २९ का ऋषि परियारको पोखरा महानगरपालिका वडा नं २९ ले पुलचोकमा अर्धकदको शालिक निर्माण गरि बुधवार सहिद दिवसको अवसरमा अनावरण गरिएको हो ।

वि स २०४६ चैत्र २६ गते पञ्चायती ब्यवस्थाको अन्त्यसंगै दलमाथीको प्रतिवन्ध हटेपछि वि स २०४७ वैशाख १६ गते तत्कालीन कास्कीको जिल्ला पञ्चायत कार्यालयमा आगलागी गराएर प्रमाण नष्ट गर्ने घटनाका विरुद्ध आन्दोलन सुरु भएकै दिन वैशाख १७ गते ऋषि परियार सहित झपेन्द्र कार्कीको गोली हानी हत्या गरिएको थियो । सोही घटनामा घाईते भएका पोखरा ६ का खेम पहारी भने अहिले जिउँदो सहिदका रुपमा परिचित छन ।

राज्यको तर्फबाट हत्या गरिएका परियार र कार्कीलाई भने अहिलेसम्म राज्यले सहिद घोषणा गरेको छैन भने सहिद परिवारले राज्यबाट पाउनु पर्ने सुविधा समेत नपाएको गुनासो पत्नी ईन्द्रमाया परियारको छ । वि स २००८ सालमा जन्मिएका परियारले ३९ वर्षको उमेरमा ज्यान गुमाउनु परेको थियो । स्वर्गीय परियार तीन छोराहरु मध्य दुई जना रोजगारीको लागि विदेशमा छन् भने एक छोरा जटिल रोगका कारण मानवसेवा आश्रम हेम्जामा रहेको परिवारको भनाई छ ।

यसैविच सहिद दिवसको अवसर पारेर निर्माण गरिएको ऋषि परियारको शालिक अनावरण गर्दै नेकपा एमालेका पोलिटब्युरो सदस्य जगत विश्वकर्माले ऋषि परियारलाई राष्ट्रिय सहिद घोषणा गर्नुपर्छ भनेर वारम्वार प्रयास गरेपनि आफु असफल भएकोमा लज्जावोध भएको वताएका थिए ।

कार्यक्रममा नेकपा एमाले गण्डकी प्रदेश अध्यक्ष नवराज शर्माले ऋषि र झपेन्द्र केवल कुनै पाटी विशेषको सहिद नभई राष्ट्रिय सहिद भएको घोषणा गरेका थिए नेकपा एमाले कास्की जिल्ला अध्यक्ष वैन वहादुर कार्कीले उहाँहरुको वलिदानीलाई सहिद दिवसको दिन र शालिक निर्माण गरेर मात्र नपुग्ने वताउदै वास्तविक सहिदको पहिचान गरि उहाँहरुको योगदान र सहिद परिवारका वारेमा राज्य उत्तरदायी हुनुपर्ने सुझाव राखेका थिए ।

सोही अवसरमा नेपाल उत्पीडित जातिय मुक्ति समाजका केन्द्रिय सचिव धन बहादुर नेपालीले सो घटनाको आफु प्रत्यक्षदर्शी भएकाले उहाँहरुलाई राज्यले निर्दोश रुपमा ताकेरै गोली हानी हत्या गरेकाले राष्ट्रिय सहिद घोषणा गर्नुपर्ने माग राखेका थिए ।

पोखरा महानगरपालिका वडा नं २९ का वडाअध्यक्ष श्रीप्रसाद गुरुङको अध्यक्षतामा भएको कार्यक्रममा नेपाली काँगे्रस वडा नं २९ का कार्यवाहक सभापति चिन वहादुर गुरुङ, वडा सदस्य सुकमाया सुनार, कर्मचारी त्रिलोचन लामिछाने र स्थानिय पुलचोक वगादी टोल विकास संस्थाका अध्यक्ष सन्तोष हमाल लगायतले सहिद ऋषि परियारका बारेमा जानकारी गराएका थिए ।