लेखनाथ,१५ मंसिर । पोखरा महानगरपालिका वडा नं २७ को तालचोकमा रहेको डायमण्ड माविले विद्यार्थीलाई विभिन्न माध्यमवाट विषय बस्तुका बारेमा जानकारी दिने उदेस्यले विभिन्न विषयसँग सम्वन्धित पढाईको कला प्रस्फुटन गराउनका लागि पढाई उत्सवको आयोजना गरेको छ ।
कक्षा ४ देखि १२ सम्मका विद्यार्थीहरुको सहभागिता रहेको कार्यक्रममा नेपाली , अङ्ग्रेजी र संस्कृत भाषामा प्रस्तुति पुस्तक समीक्षा, कविता वाचन , कथा वाचन , जीवनी वाचन , निबन्ध वाचन, गजल गायन , समाचार वाचन , बधाई पत्र वाचन , शुभकामना पत्र वाचन , सूचना वाचन , विज्ञापन वाचन , संस्कृत श्लोक वाचन , संवाद वाचन , श्रीस्वस्थानी व्रतकथा वाचन , नियात्रा वाचन , भाषिक खेल लगायतका लगभग चार दर्जनका विषयमा प्रस्तुति रहेको थियो ।
अभिभावक , विद्यालय व्यवस्थापन पक्ष , शिक्षक एवं विद्यार्थीहरूको सहभागिता रहेको कार्यक्रममा प्रधानाध्यापक याम बहादुर रोकाले विद्यालयले विद्यार्थीको अतिरिक्त क्षमता विकासका लागि प्रयास गरिरहेको र पठन संस्कृतिको विकासका लागि प्रयत्नरत रहेको बताएका थिए ।
सोही अवसरमा शैक्षिक प्रमुख सञ्जीव थापाले विद्यार्थीहरूमा रचनात्मकता र समीक्षात्मक चिन्तन बढ्दै गएको धारणा राखेका थिए भने पुस्तक समीक्षालाई अझै विकास गर्दै स्थापित लेखकहरूसँग सहकार्य गरेर विद्यालयमा प्राज्ञिक वातावरण निर्माण गर्ने भावी योजनाका बारेमा जानकारी गराएका थिए ।
कार्यक्रममा विद्यालयका निर्देशक माधवशरण उपाध्यायले विद्यार्थीका प्रस्तुति सुन्दर र शक्तिशाली रहेको , छात्राहरूमा रचनात्मकता धेरै भएको , विज्ञान तथा प्रविधिको प्रयोगमा विद्यार्थीहरू अब्बल रहेको , भाषिक स्पष्टता र कलात्मक प्रयोग गर्न सफल रहेको , विद्यालयले शुक्रवारलाई बुक फ्रि पद्धतिमा लैजान प्रयास गर्ने र भविष्यमा यो कार्यक्रमलाई अझै व्यवस्थित बनाएर अघि लैजाने योजना सुनाएका थिए । कक्षा ७ की छात्रा सलिना बगालेको अध्यक्षतामा भएको कार्यक्रमको सञ्चालन संयोजक तारानाथ पराजुली, आकृति पाण्डे र सृष्टि लामिछाने गरेको विद्यालयकी शिक्षीका सविता ढुगानाले जानकारी दिएकी छन् ।
Discussion about this post