लेखनाथ, १७ असार । कास्की जिल्लाको दोस्रो पर्यटकिय गन्तब्य बेगनासतालमा जलकुम्भीको प्रकोप बढेर आफनो पेशा नै संकटमा पर्ने सम्भावना देखे पछि मत्स्य व्यवसायी समितिको प्रयासमा जलकुम्भी हटाउने अभियान शुरु गरिएको छ ।
तालको उत्तरी भागतर्फ पानीको मुख्य स्रोत भएको स्याङखुदी, लिब्दी, मलादी र कँडेलकुनाको भागमा जलकुम्भी फैलन थालेपछि माछा मारेर आफनो जिविकोपार्जन गर्दै आएका जलारी समुदायको साझा संस्था मत्स्य ब्यवसायि समितिका ५६ घर परिवारले दैनिक रुपमा जलकुम्भी फाल्ने अभियान संचालन गरेका हुन् ।
“वि.सं. २०५६/५७ साल देखि तालमा जलकुम्भी देखिन थालेपछि यहाँ रहेका अन्य सरोकारवाला र सरकारी निकायको समेत सहयोगमा जलकुम्भी फाल्दै आएपनि पछिल्लो समय तालको सौन्दर्य हराउने र आफ्नो पेशा समेत संकटमा पर्ने हो कि भन्ने चिन्ताले हामीहरुले प्रत्येक घरधुरीबाट जनश्रमदान गरि जलकुम्भी फाल्ने अभियान संचालन गरेका हौं” मत्स्य ब्यवसायि समितिका अध्यक्ष राजेन्द्र जलारी वताउँछन् ।
करिव तीन सय ७३ हेक्टर क्षेत्रफलमा फौलिएको तालको मुख्य पानीको स्रोत भएकोे ठाँउमा जलकुम्भी फैलन थालेपछि वि.स. २०५९ साल देखि सिड फाउण्डेसन कास्की, पर्यटन वोर्ड, स्थानिय सरकार र अन्य सरोकारवालको सहयोगमा बेगनासतालमा जलकुम्भी फाल्ने अभियान संचालन भएको थियो । पछिल्लो समय तालको माथील्लो भागबाट जलकुम्भी वग्दै आएपछि तालको स्वरुप नै विगार्ने र हामीहरुको पुर्खौंदेखिको माछा मार्ने पेशा समेत संकटमा पर्न थालेपछि उनीहरुले असारको १५ गते देखि दैनिक रुपमा ५६/५७ जनाको सहभागीतामा जलकुम्भी फाल्ने अभियान संचालन गरिएको अध्यक्ष राजेन्द जलारी वताए ।
ताल नै ढाक्ने गरि जलकुम्भी फैलन थालेपछि यसको रोकथाम र नियन्त्रणका लागि सरकारी निकायदेखि बेगनासतालको नाम बेचेर कमाइ गर्नेहरुको ध्यान नपुगेकाले यो ताल हाम्रो हो यसको संरक्षण हामीहरुले नै गर्नु पर्छ भन्दै प्रत्येक दिन जलारी समुदायको एकल प्रयासमा जलकुम्भी निकाल्दै तालको किनारामा फाल्दै आएको मत्स्य ब्यवसायी समितिकी सदस्य पार्वती जलारी वताउँछिन् ।
यसैविच ताल किनारको सयौं रोपनीमा जलकुम्भी फैलन थालेपछि तालमा घुम्न आउने पर्यटकले डुङगा चलाउन देखि जलारी समुदायले माछा मार्नका लागि प्रयोग गरेको जालमा समेत असर पुगेकाले जलकुम्भी फाल्नु पर्छ भनेर अभियान संचालन गरिएको मत्स्य ब्यवसायि समितिका निवर्तमान अध्यक्ष झलक जलारीको भनाई रहेको छ ।
उनका अनुसार विगतका वर्षहरुमा सामाजिक संघ सस्था र सरकारी निकायको सहयोग रहदै आए पनि पछिल्ला दिनहरुमा स्थानिय निकाय एवं संघ संस्थाहरुको सक्रियता नदेखीएकोमा असन्तुष्टि व्यक्त गरे । उनले ताल हामी सबैको साझा सम्पदा भएको र अबको २०/२५ दिनसम्म सञ्चालन हुने जलकुम्भी सफाई कार्यक्रममा सहभागी हुन सामाजीक संघ संस्था एवं समुदायलाई आब्ह्वान गरेका छन् ।
Discussion about this post