भजन चुट्कामा तनहुँको दाजुभाइ समूह प्रथम

लेखनाथ, फागुन । कास्कीको लेखनाथमा आयोजित खुल्ला भजन चुट्का प्रतियोगितामा तनहुँको दाजुभाइ भजन समूह प्रथम भएको छ ।
महानगरपालिकाको वडा नं. २६ स्थित लोकसंस्कृति संरक्षण समिति र उज्ज्वल आमा समूहद्वारा सक्नेरीमा आयोजित प्रतियोगितामा सहभागी अन्य आठ समूहलाई पछि पार्दै दाजुभाई समुहले प्रथम स्थान हासिल गर्न सफल भएको हो ।

प्रतियोगितामा धारापानी भजन समूह द्वितीय, वेगनास भजन समूह तृतीय भयो भने नमूना आमा समूह र भुलभुले भजन समुूहले सान्त्वना स्थान हासिल गरेका थिए ।

प्रतियोगितामा प्रथम हुनेले समुहले २५ हजार, द्वितीयले १५ हजार, तृतीयले १० हजार र सान्त्वना स्थान हासिल गर्नेले ५÷५ हजार रुपैयाँ नगद पुरस्कार र प्रमाणपत्र प्राप्त गरेका छन् ।

कलाकारहरु प्रजापति पराजुली, जीवन दाहाल, तारापति सुवेदी र शिवहरि ढुङ्गाना रहेको निर्णायक समितिले विजेताहरुको छिनोफानो गरेको हो ।

यसअघि कार्यक्रम शुभारम्भ गर्दै पोखरा महानगरपालिका वडा नं–२६ का वडाध्यक्ष नरेन्द्र थापाले मौलिक संस्कृति र परम्पराको संरक्षणमा जोड दिए । उनले धर्म र संस्कृति जोगाउन प्रतियोगिताले महत्वपूर्ण भूमिका खेल्ने विश्वास व्यक्त गरे ।

कार्यक्रममा लेखनाथ खानेपानी उपभोक्ता संस्थाका अध्यक्ष मुरारी शर्मा, लेखनाथ उद्योग वाणिज्य संघकी महासचिव जानुका पराजुली, उज्जल आमा समुहकी उपाध्यक्ष सरस्वती गौतम लगायतले युवा पुस्तालाई हाम्रो धर्म र संस्कृतीका वारेमा जानकारी गराउन यस प्रकारको प्रतियोगिता उपयोगी हुने विश्वास दिलाएका थिए ।

महाशिवरात्रीको पुर्व सन्ध्यामा ‘धर्मको रक्षा गरौँ, संस्कृतिको रक्षा गरौँ’ भन्ने मूल नाराका साथ भजन चुट्का प्रतियोगिता आयोजना गरिएको हो । लोक संस्कृति संरक्षण समितिका अध्यक्ष जगन्नाथ तिमल्सेनाको अध्यक्षतामा भएको कार्यक्रमको सञ्चालन सचिव तारा शर्माले गरेकी थिइन् ।