अहिले पछिल्लो समय जो पनि नेता भएका छन् ती नेता टोले गुण्डाजस्तै देखिन्छन्। नेता हुनु र नेतृत्व गर्नु अलग कुरा हो। नेता मात्रैले नेतृत्व नगर्न सक्छन् तर जसले नेतृत्व गर्छ, ऊ खास नेता हो । असल नेता हुन अझ नेतृत्व गर्न त्यति सहज छैन । असली नेता त्यो हो, जसले भिडलाई पछि लगाउन सक्छ । भिडको पछि लाग्ने त नेता नै होइन । तर, विडम्बना नेपालमा भिडलाई पछि लगाउने भन्दा भिडको पछि लाग्ने ‘कथित नेता’ हरूको संख्या लगभग शतप्रतिशत नजिक छ ।
आजको मूल प्रश्न नै यही हो कि, नेतृत्व गर्ने कि नेता हुने त ? कुनै पनि सामाजिक, आर्थिक, साँस्कृतिक आदि पक्षको वृत्ति- विकासको लागि नेता नै हुनुपर्छ भन्ने छैन । तर काम गर्ने आँट, दृढ विश्वास अनि समाज रुपान्तरणको सपना देखियो भने नेता हुन जरुरत नै पर्दैन । नेतृत्व स्वतः आइपुग्छ । कहिलेकाहीँ मान्छेको कर्मले नै पद खोज्दै आइपुग्छ । तर, जसले बढी पद खोज्छ, आर्थिक लाभमा ध्यान दिन्छ, त्यस्ता प्रवृत्ति भएका व्यक्ति नेतामात्रै चाहिँ हुनसक्छ । तर, नेतृत्वदायी भूमिका निर्वाह गर्न सक्दैनन् । अर्थात् नेतृत्व गर्न सक्दैनन् । अहिलेको मुख्य समस्या नै यही हो कि, पार्टी-आन्दोलनलाई उचाइमा लाने कि आफू नेता बन्ने ? ।
पछिल्लो समय पार्टी र आन्दोलन कमजोर किन नहोस्, कुनै प्रवाह नराख्ने तर जसरी पनि आफू नेता बन्न लागि पर्ने । यो प्रवृत्ति अधिक रहेको छ । नेपालमा पछिल्लो समयमा च्याउसरी पार्टी निर्माण हुनुमा यो पनि एक प्रमुख कारण हो ।
असोज १५ र १६ गते नेकपा एमालेको गण्डकी प्रदेश कमिटीको अधिवेशन हुँदैछ । यो अधिवेशन महत्वपूर्ण छ किनभने, गण्डकी प्रदेश कमिटीको प्रथम अधिवेशन हो । यसअघि लुम्बिनी प्रदेशको अधिवेशन सम्पन्न भएको छ । लुम्बिनीले नेतृत्व प्रत्यक्ष चुनेर एक खालको सन्देश प्रवाह गरिसकेको छ । गण्डकीले यो अधिवेशनबाट के सन्देश दिन्छ त ? गण्डकी प्रदेश कमिटीका केही कार्यभार छन् । जुन कार्यभारले पार्टी काम उठाउन र जनतासँग प्रत्यक्ष जोडिन सहज हुन्छ ।
ती कार्यभार निम्नानुसार छन्- युवापुस्ताहरूको पलायन रोक्नु प्रमुख चुनौती छ । कार्यकर्ताहरुलाई कम्युनिष्ट आन्दोलन, मार्क्सवाद, जबज आदि विषयमा प्रशिक्षण दिएर वैचारिकरूपमा धारिलो बनाउनुपर्ने चुनौती छ । नेता, कार्यकर्ताहरूको उचित व्यवस्थापन गर्नुपर्ने छ । नेतृत्वको जाम खुलाउने चुनौती छ ।
पार्टीमा युवापुस्ता र पहिलो/दोश्रो पुस्ता मिलाएर नेतृत्व स्थापित गर्ने मुख्य चुनौती छ । पार्टीविरुद्ध चौतर्फी घेराबन्दी छ, त्यो घेराबन्दीलाई तोड्दै पार्टीलाई एकढिक्का बनाएर जनतामाझ जान झनै चुनौती छ । हो, गण्डकी प्रदेशमा यस्तै चुनौती सामना गर्ने नेतृत्वको खाँचो छ ।
Discussion about this post