लेखनाथ, १ भाद्र । नागरिक परोपकार समन्वय संस्था पोखरा–३० को चौंथो वार्षिक साधारण सभा शुक्रबार सम्पन्न भएको छ ।
सभाको उद्घाटन गर्दै पोखरा महानगरपालिकाका प्रमुख मेयर धनराज आचार्यले विपत व्यवस्थापनका कार्यहरुमा संस्थाले गर्दै आएका कार्यहरुको प्रशंसा गर्दै आगामी दिनमा महानगरको विपद व्यवस्थापन समितिसँग सहकार्य गर्दै अगाडी वढ्नुपर्ने आवश्यकता रहेको र विपदका घटनाहरु घट्न नदिनेतर्फ सबैजना सचेत हुनुपर्ने एवं हुनसक्ने घटनाहरुलाई मध्यनजर राख्दै पुर्वतयारीका गतिविधिहरुलाई पनि सहकार्यका माध्यमबाट अगाडी वढ्न सुझाव दिएका थिए ।
मेयर आचार्यले विश्व बैंकको आर्थिक सहयोगमा पोखरा–२६ अर्घौंदेखी शिशुवा, खुदी हुँदै गगनगौंडा जोडीने सडक मार्ग निर्माणको लागी योजना छनोट भएको र यसलाई सफल बनाउन सम्पुर्ण स्थानीयले सहयोग गर्नुपर्ने वताएका थिए ।
उक्त अवसरमा मेयर आचार्यले संस्थाको नवनिर्मित भवनको उद्घाटन समेत गरेका छन । करिब ३० लाखको लागतमा निर्माण सम्पन्न भएको ५ कोठे भवनमा संस्थाको कार्यालय, सभाहल, विपद व्यवस्थापनका सामग्रीहरुको स्टोर रहेका छन ।
यस्तै रुपा गाउँपालिकाका अध्यक्ष नवराज ओझाले नागरिक परोपकार समन्वय संस्था रुपा गाउँपालिकाको पनि सहयात्री संस्था भएको र आफुहरुले पनि संस्थाको सेवाबाट लाभ लिन पाएको वताए । उनले गाउँपालिकाले व्यवसायीहरुका लागी व्यवसायमैत्री निती ल्याएको वताउँदै रुपा गाउँपालिकालाई व्यवसायको हब बनाउन सकिने पनि वताएका थिए ।
कार्यक्रममा पोखरा–३० का वडाध्यक्ष एवं संस्थाका संरक्षक दुर्गा प्रसाद सुवेदी, नेपाल उद्योग वाणिज्य महासंघका केन्द्रीय सदस्य बाबुराम गिरी, लेखनाथ उद्योग वाणिज्य संघका अध्यक्ष छत्रधर आत्रेय, संस्थापक संरक्षक श्रीराम पोखरेल, संस्थापक अध्यक्ष राजेन्द्र ओझा, पोखरा महानगर कार्यपालिका सदस्य भिम कुमारी पुन लगायतले बोलेका थिए ।
संस्थाका अध्यक्ष चिरञ्जीवी तिवारीको अध्यक्षतामा सम्पन्न कार्यक्रमको सञ्चालन सचिव गिता जमरकटृेलले गरेकी थिईन भने धन्यवाद ज्ञापन उपाध्यक्ष देवराज पन्थीले गरेका थिए ।
Discussion about this post