पोखरा महानगरपालिका वडा नं.२६ को सार्वजनिक सुनुवाइ

लेखनाथ, २५ साउन । पोखरा महानगरपालिका वडा नं.२६ को आर्थिक वर्ष २०७९÷०८० को सार्वजनिक सुनुवाइ कार्यक्रम बिहिबार सम्पन्न गरिएको छ । वडा कार्यालय र नागरिकहरुका बीचमा दोहोरो सम्वाद स्थापित गर्दै विकास प्रक्रियामा नागरिकहरुको रचनात्मक प्रतिनिधित्व सहित जवाफदेहिता तथा पारदर्शिता प्रवद्र्धन गर्ने उद्देश्य अनुरुप सार्वजनिक सुनुवाइ कार्यक्रम गरिएको वडा अध्यक्ष नरेन्द्र थापाले बताए ।

सो क्रममा आ.व २०७९/०८० मा कार्यालयसँग सम्बन्धित समस्या, जनगुनासो तथा उजूरीहरुको सुनुवाइ, वर्षभरि सञ्चालन गरिएका योजना, परियोजना, कार्यक्रम, बजेट आदिका बारेमा सम्बन्धित सरोकारबाला तथा नागरिकहरुलाई विस्तृत जानकारी दिइएको थियो ।
सार्वजनिक सुनुवाइका क्रममा नागरिकहरुले वडाको दैनिक सेवाप्रवाह, विकास निर्माणका कार्यक्रमहरुको प्रगति, सांगठनिक शुसासन, पारदर्शिता तथा जवाफदेहिता, मापदण्ड कार्यान्वयन, सार्वजनिक सम्पतिको संरक्षण सहित समग्र वडाको विकास प्रक्रियाका बारेमा जिज्ञासा राखेका थिए ।

जिज्ञासाको सम्बोधन गर्दै, अध्यक्ष थापाले वडामा रहेको खास्टे, निउरेनी र गुँदेताल बेचेर खान कसैलाई नदिने बताएका छन । उनले भने–‘ताल स्थानिय सरकारको सम्पती हो, कसैले धन्दा चलाएर वा बेचेर खान पाउदैन ।” वडालाई आफ्नो सम्पतीको रक्षा कसरी गर्नु पर्दछ त्यो थाहा छ । ’

सरकारी सम्पति अतिक्रमणको बिषयमा उठेको प्रश्नको उत्तर दिने क्रममा अध्यक्ष थापाले भने –‘कसैलाई सार्वजानिक सम्पति खान्छु भन्ने लागेको छ भने त्यो भ्रम हो । हामीले हाम्रो सम्पती के कति छ ? खवर पाम भनेर नापी र मालपोत कार्यालयसँग सुचना मागेका छौँ । सार्वजनिक सम्पति माथी कसैले गिद्दे नजर नलगाए हुन्छ । ’अध्यक्ष थापाले जनताको गुनासो सम्बोधन गर्नकै लागि जनप्रतिनिधी बनेको र जनताको सुझाब, गुनासो आलोचनालाई शिरोधार्य गरेर आगामी दिनमा सुन्दर वडा निर्माण गर्ने कार्यमा हातेमालो गर्ने प्रतिबद्धता गरेका थिए ।

वडाद्धारा संचालित विकास कार्यक्रम, उपलब्ध सेवा, वस्तु र सुविधा सार्वजनिक सहित ति विषयका सम्वन्धमा सार्वजनिक रुपमा सेवाग्राही नागरिकले उठाएका प्रश्नहरुमा स्पष्टता ल्याइ नागरिकबाट प्राप्त रचनात्मक सुझावलाई ग्रहण तथा जिम्मेवार संस्कार बसाउन सार्वजनिक सुनुवाई कार्यक्रम प्रभावकारी हुने विश्वास गरिएको छ ।

कार्यक्रममा पोखरा महानगरपालिकाका प्रमुख प्रशासकिय अधिकृत श्यामकृष्ण थापा, महाशाखा प्रमुखहरु जयराम पौडेल, भरतराज पौडेल, कृष्ण तिवारी र पोखरा महानगरका वडाअध्यक्षहरु किरण बराल, सन्तोष बास्तोला, दिपेन्द्र मरसानी, तोरण बहादुर बानियाँ र दुर्गा सुवेदीको उपस्थिति रहेको थियो । कार्यक्रममा प्रमुख प्रशाकिय अधिकृत श्याम कृष्ण थापाले कार्यक्रममा सहभागिको संख्या र कार्यक्रमको नमूनाका बारेमा प्रशंसा गरेर आगामी दिनमा सहकार्य गरेर अगाडी बढ्ने बताएका थिए ।

कार्यक्रममा वडाका जनप्रतिनिधिहरु सहित कर्मचारीहरु, बिभिन्न राजनीतिक दलका प्रतिनिधीहरु, नागरिक समाज, आमा समुह, युवा क्लव र बिभिन्न समुदायका समुहहरुको सहभागिता थियो । कार्यक्रममा वडा सदस्य तिर्थ बहादुर राजभाटले स्वागत गरेका थिए भने वडाका सचिब मिना भट्टराई भण्डारीले वडाको प्रगति प्रतिबेदन पेश गरेकी थिईन ।

कार्यक्रम संचारकर्मी शुरेस रानाभाटले संचालन गरेका थिए भने कार्यक्रमहरुमा वडा सदस्यहरु लक्ष्मीदेवी भट्टराई, सुजाता वराल सुनार र सुदिपराज ढुङ्गानाको सहभागिता रहेको थियो ।

सार्वजनिक सुनुवाईमा सेवा प्रवाह र सुशासनको सम्वन्धमा सेवाग्राहीले सन्तुष्टी व्यक्त गरेका थिए । सार्वजानिक सुनुवाईको अवसरमा वडाको बृत्तचित्रको बिशेष प्रदर्शन गरिएको थियो बृत्तचित्रको लेखन तथा निर्देशन सौगात पोखरेलले गरेका थिए । कार्यक्रममा वडा नं. २६ का एक हजार बढि स्थानियको सहभागिता रहेको थियो ।