६८ यूनिट रगत संकलन

लेखनाथ, चैत्र ९ । गण्डकी मिजार समाज पोखरा–२६ सक्नेरीले आयोजना गरेको रक्तदान कार्यक्रममा ६८ यूनिट रगत संकलन भएको छ । रक्तदान जिवनदान, जिवनदान महादान भन्ने मुल नाराका साथ बिहिबार आयोजित खुल्ला रक्तदान कार्यक्रममा उक्त परिमाणमा रगत संकलन भएको हो ।

कार्यक्रमको शुभारम्भ गर्दै पोखरा महानगरपालिका वडा नं. २६ का वडाध्यक्ष नरेन्द्र थापाले एक पोका रगतले गर्दा मान्छेको जिवन बाँच्न सक्ने भएकाले रक्तदान गर्न र अरुलाई पनि बेला बेलामा रक्तदान गर्नुपर्छ भन्ने कुरा सिकाउन आग्रह गरेका छन ।

वडाध्यक्ष थापाले समाजले गर्दै आईरहेका गतिविधिहरुलाई आफुले विगतदेखी नै नियालीरहेको वताउँदै समाज परिवर्तनका धेरै कार्यहरु गर्दै आईरहेकोमा प्रशंसा गरेका थिए । वडाको तर्फबाट समाजको निर्माणाधिन भवनलाई सम्पन्न गर्न आगामी आर्थिक वर्षमा केही रकम छुट्टाउने प्रतिवद्धता समेत व्यक्त गरेका छन ।

कार्यक्रममा धादिङ सम्पर्क समाजका अध्यक्ष राजु पाण्डे, महासचिव हरि पन्त, लेखनाथ पत्रकार मञ्चका संस्थापक अध्यक्ष भिमपाणी बराल, लेखनाथ निर्माण व्यवसायी समितिका बरिष्ठ उपाध्यक्ष भिम नेपाली ‘काईँला’ लायन्स क्लब ईन्टरनेशनल ३२५ जे का डिष्ट्रिक्ट अफिसर रामचन्द्र सेढाई। मिजार समाज गण्डकीका सल्लाहकार तिलक रोका लगायतले बोलेका थिए ।

संस्थाका अध्यक्ष गोपाल नेपालीको अध्यक्षतामा समपन्न कार्यक्रममा उपाध्यक्ष मन बहादुर चर्मकारले स्वागत गरेका थिए भने सल्लाहकार बुद्धराज बस्यालले कार्यक्रमको सञ्चालन गरेका थिए ।