पोखरा । नेपाली कांग्रेसको १४ औं महाधिवेशनअन्तर्गत शनिबार पालिकास्तरीय कार्यसमिति चयन हुँदै छ । कास्कीका केही पालिकामा सर्वसम्मत नेतृत्व चयन भएको छ भने कतै प्रयास जारी छ । पोखरा महानगर र माछापुच्छ्रेको पदाधिकारीमा मात्रै निर्वाचन हुने सम्भावना छ । सदस्यहरु करिव सर्वसम्मत भइसकेका छन् ।
अन्नपूर्ण गाउँपालिकामा सर्वसम्मत नयाँ कार्यसमिति चयन भइसकेको छ । यद्यपि घोषणा शनिबार मात्रै हुने छ । सभापतिका लागि मनपति भण्डारीले मात्रै मनोनयन दर्ता गराएका छन् । उपाध्यक्ष सुशील भट्टचन र गौमाया नेपाली, सचिव कृष्णप्रसाद सुवेदी र विजय गुरुङ एवं सहसचिव ध्रुव घले र मुक्ति गुरुङ चयन भएका हुन् । सदस्यहरु पनि सर्वसम्मत निर्वाचित भएका हुन् ।
रुपामा पनि करिब सर्वसम्मत भएको छ । सभापतिमा ३ जनाले उम्मेदवारी दिए पनि सहमतिमा मनोनयन फिर्ता लिने तयारी छ । विमलबाबु न्यौपानेलाई सभापति बनाएर आकांक्षीहरु लक्ष्मण थापा र खेम गुरुङ मनोनयन फिर्ता लिन सहमत भएका छन् । सुरुमा यहाँ गीमाया गुरुङ र ढकबहादुर थापाले पनि उम्मेदवारी घोषणा गरेका थिए ।
उपसभापतिमा गेसबहादुर गुरुङ र शंकरलाल श्रेष्ठ छन् भने सचिवमा बुद्धिबहादुर खड्का र विकल ओझा तथा सहसचिव विकाश ओझा र निर्मल केसी छन् । सदस्यहरु पनि सर्वसम्मत भएका नेता प्रकाशमोहन खनालले जानकारी दिए ।
माछापुच्छ्रे गाउँपालिकामा भने सर्वसम्मत नहुने देखिएको छ । त्यहाँ २ वटा प्यानलै घोषणा गरेर मनोनयन दर्ता भएको छ । मधुसुदन अधिकारीको नेतृत्वमा उपाध्यक्षहरु राम गुरुङ र मीनबहादुर गुरुङ, सचिवमा केशव अधिकारी र सञ्जय लम्साल, सहसचिवमा बालकृष्ण गौतम र रवि अधिकारी रहेको एउटा समूह छ । यस्तै, वीरेन्द्र गुरुङको नेतृत्वमा प्रकाश गुरुङ र अमृतबहादुर क्षेत्री, सचिवमा गोविन्दप्रसाद ढुंगाना र चिजबहादुर विक, सहसचिव एक जनामात्रै महादेव गुरुङ राकेशको उम्मेदवारी परेको छ । मिल्ने सम्भावना नभएको उम्मेदवारहरु बताउँछन् ।
मादीमा अझै सर्वसम्मतको प्रयास भइरहेको छ । त्यसैले शुक्रबार मनोनयन समेत गरिएको छैन । यहाँ देवीजंग गुरुङ, अर्जुन गुरुङ र यामबहादुर गुरुङ दावेदार छन् । यसअघि ओमप्रकाश गुरुङले पनि दाबी देखाएका थिए तर अन्तिम समयमा उनी सहमति गर्दै प्रतिस्पर्धाबाट पछि हटेका छन् । पोखरा महानगरपालिकामा यसअघि नै मनोनयन भइसकेको छ । यहाँ ६ जनाले सभापतिमा आकांक्षा देखाएका छन् । पत्रकार गंगाधर पराजुली, पोखरा ११ का वडाध्यक्ष मोहनप्रसाद बास्तोला र पोखरा ९ का वडाध्यक्ष रामराज लामिछाने, अर्का नेता मिलन तिवारी, पोखरा उद्योग वाणिज्य संघका महासचिव सुरेन्द्रमान विजुक्छे र अर्की पत्रकार ज्योति हमालले मनोनयन दर्ता गराएका छन् ।
उपसभापतिमा पनि ६ जनाकै मनोनयन दर्ता भएको छ । कृष्णप्रसाद अधिकारी, निर्दोषविक्रम पौडेल, प्रयागराज भण्डारी, भवसागर बराल, शिव केसी र राजेन्द्र बरालले मनोनयन दर्ता गराएका हुन् । २ जना नै निर्वाचित हुने सचिवमा ३ जना, तथा २ जना नै निर्वाचित हुने सहसचिवमा ७ जनाले दाबी गरेका छन् । सचिवमा गणेशबहादुर थापा, टुबराज बास्तोला, सुरेन्द्रबावु तिवारीले नाम दर्ता गराए ।
सहसचिवमा नरेन्द्र बास्तोला, पुष्पराज सिग्देल, रविन कायस्थ, लक्ष्मी बास्तोला, शिवमोहन अधिकारी, सञ्जय आले र संघर्ष कोइरालाले दाबी पेस गरेका छन् । कार्यसमिति सदस्यमा अधिकांश निर्विरोध निर्वाचित भएका छन् । अन्य पालिकामा पनि सदस्यको प्रतिस्पर्धा खासै छैन । पोखरा महानगरपालिकामा १ हजार ३ सय ७० जनाले मतदान गर्न पाउने छन् । माछापुच्छ्रेमा १ सय ७३, अन्नपूर्णमा १ सय ९८, मादी १ सय ९२ र रुपामा १ सय ३० जना मतदाता छन् । पालिकाको कार्यसमिति चयन गर्न क्षेत्रीय प्रतिनिधि र वडा सभापतिहरुले मतदान गर्ने छन् ।
वडाजस्तै पालिकामा पनि महिलाको नेतृत्व करिब शून्य देखिएको छ । त्यसो त महिलाले आकांक्षा पनि देखाएका छैनन् । रुपामा गीमाया गुरुङले आकांक्षा देखाए पनि अन्तिममा ‘ब्याक’ भइन् । पोखरामा एक जना महिला उम्मेदवार छिन् ।
Discussion about this post