लेखनाथ, २७ भदौ । यहि असोज २ गते हुन गईरहेको लेखनाथ उद्योग वाणिज्य संघको १३ औं महाधिवेशनको लागी कोषाध्यक्षमा ३ जनाको उम्मेद्वारी परेको छ ।
उम्मेद्वारी दिनेहरुमा वर्तमान कार्यसमिति सदस्यहरु भिम बहादुर नेपाली काँईला, भरतराज ओझा र रामजी पौडेल रहेका छन ।
२०७० सालमा साधारण सदस्यको रुपमा उद्योग वाणिज्य संघ प्रवेश गरेका भिम बहादुर नेपाली काँईलाले २ कार्यकाल उप–समिति संयोजक र २ कार्यकाल कार्यसमिति सदस्यको रुपमा कार्य गरिसकेका छन । १ कार्यकाल पराजय समेत व्यहोरेका नेपालीले पराजय पछि पनि मतदाताहरुकोमा पुगेर धन्यवाद व्यक्त गरेका थिए ।
व्यवसायीको हकहित , आधारभुत आवश्यकताको सम्बोधन एवं कृषिको व्यवसायीकरण लगायतका विषलाई लिएर मतदाताहरुको विचमा पुगिरहेका नेपालीले आफु विजयी भएको खण्डमा १७ सय सदस्य संख्यालाई बढाएर ३ हजार पुर्याउने र कृषि उपज खरिद विक्रि केन्द्रलाई चलायमान बनाई कोषको अवस्था मजबुत एवं पारदर्शी बनाउने प्रतिवद्धता व्यक्त गरेका छन ।
संघमा आफ्नो कार्यअनुभव राम्रो रहेको र सबै व्यवसायीहरुको मनमुटुमा वस्न सफल भएकोले अन्य खालका चलखेलहरु नभएको खण्डमा आफ्नो जित सुनिश्चित रहेको उनले दावी गरे ।
यस्तै कोषाध्यक्ष पदको उम्मेदवारहरुमध्ये आफुलाई सबैभन्दा पुरानो सदस्य भएको दावी गर्ने रामजी पौडेलले अहिलेसम्म संघका हरेक गतिविधिहरुको सक्रिय रुपमा सहभागि हुँदै आईरहेको र व्यवसायीका पिर मर्कालाई बुझेर निराकरण गर्न सक्ने क्षमता आफुमा रहेको वताउँदै उम्मेद्वारी दर्ता गरेको वताए ।
२०६० सालदेखी साधारण सदस्यको रुपमा संघमा आवद्ध भएका पौडेलले व्यवसायीक हक हित सुनिश्चित गर्नु नै आफ्नो मुख्य एजेण्डा रहेको वताउँदै आफु कोषाध्यक्ष पदमा निर्वाचित भएमा विभिन्न आर्थिक क्रियाकलापहरुलाई चलायमान गराउँदै कोष वृद्धि गर्ने वताए ।
यसै गरि २०७४ सालमा साधारण सदस्यको रुपमा संघमा प्रवेश गरेका व्यवसायी भरत ओझा सम्पुर्ण व्यवसायीहरुमाझ परिचित भएकै कारण जित सुनिश्चित रहेको दावी गर्दछन । लेखनाथका विभिन्न क्षेत्रमा आफ्नो व्यवसाय रहेकाले सबै व्यवसायीहरुसँग नजिककको सम्बन्ध रहेको र उहाँहरुले आफुलाई मतदान गर्ने निश्चित रहेको उनको दावी छ ।
२ कार्यकाल कार्यसमिति सदस्यको रुपमा संघमा सेवा गरिसकेका ओझाले संघले आयोजना गर्ने लेखनाथ महोत्सवमा स्टल संयोजक एवं टिकट संयोजक भएर काम गर्दा ऐतिहासिक काम गरेको दावी गर्छन । कोरोना महामारीले व्यवसायीहरुलाई पारेको असरलाई न्यूनिकरण गर्दै उत्थान गर्नुपर्ने र महामारीलाई मध्यनजर गर्दै राज्यले ल्याएका सुविधाहरुलाई संघमार्फत व्यवसायीहरुसमक्ष पुर्याउने मुख्य एजेण्डा लिएर मतदाताहरुमाझ पुगिरेहेका ओझाले व्यवसायीहरुबाट सकारात्मक प्रतिक्रिया पाईरहेको वताउँछन ।
कोषाध्यक्ष पदका उम्मेदवारहरुमा तिनै जनाले आफ्नो जित सुनिश्चित रहेको दावी गरेपनि पदमा कसलाई पुर्याउने भन्ने जिम्मा मतदाता व्यवसायीहरुमा निर्भर छ । निर्वाचनको समय नजिकिंदै जाँदा तिनैजनाले प्रचार प्रसार एवं व्यवसायीहरुसँगको भेटघाट कार्यक्रमलाई तिव्रता दिएका छन । संघको २५ औं साधारणसभा तथा १३ औं महाधिवेशन यहि असोज १ र २ गते हुँदैछ ।
Discussion about this post