साउन २७, लेखनाथ। लेखनाथका व्यवसायीहरुको छाता संगठन लेखनाथ उद्योग बाणिज्य संघको १३ औं महाधिवेशन भदौको १८ र १९ मा हुने भएको छ।संघले नयाँ नेतृत्व पाउने महाधिवेशन नजिकिदै गर्दा व्यबसायी हरु बिच एक खाले आंकलन दैनिक जसो भईरहेको छ। यसपटक पनि संस्थापन पक्षकै सिण्डीकेट र पाइपलाइनकै उम्मेदवारहरु चुनावी मैदानमा देखिदैं छन् । वर्तमान कार्यसमितिका पदाधिकारीहरुको एक तह वढुवा जस्तै हुने गरी उम्मेदवारको चर्चा रहेको छ । बिशेषत राजनैतिक भागवण्डामा पदाधिकारी चयन हुने परम्परा यसपाली पनि कायम हुने देखिन्छ।
अब कुरा गरौं संघका केहि असफल योजनाहरु बारे।
लेखनाथ उद्योग बाणिज्य संघले महत्वाकांक्षी योजनाका रुपमा अघि सारेको कृषि उपज बजार अहिले अलपत्र परेको छ । पोखरा महानगरको वडा नं. २७ मा निर्माण भएको कृषि उपज बजार एक बर्ष देखि सञ्चालनमा ल्याउन नसक्दा अलपत्र परेको हो । एकबर्ष अघि निर्माण सम्पन्न भएर उद्घाटन भएको कृषि उपज संकलन तथा बिक्री केन्द्रमा संघले एक करोड भन्दा बढी लगानी गरेको छ । पोखरा महानगर, प्रदेश सरकार, संघिय सांसद र संघले संकलन केन्द्रमा एक करोड भन्दा बढी खर्च गरेका हुन । यस्तै सोही केन्द्रमा स्थापना गरिएको कोल्डस्टोर समेत संचालन आउन सकेको छैन । उसो त कोभिड संक्रमणका कारण मेला महोत्सव गर्न नसक्दा संघलाई बार्षिक ५० लाखको हाराहारीमा आर्थिक नोक्सानी भएको छ । बार्षिक भाडा र स्टेज समेत अहिले अलपत्र जस्तै बनेको छ ।
संघका वर्तमान अध्यक्ष बलराम ढकाल र कार्यसमितिले अघि सारेका कतिपय योजनाहरु कार्यन्वयन नै नभई तुहिएका छन् । संघले महत्वकांक्षी योजनाको रुपमा अघि सारेको च्याम्बर भिलेज नाम मात्रैमा सिमित भएको छ । यस्तै बेगनासतालमा हरेक शुक्रबार गरिने भनिएको बेगनास पर्यटन प्रवद्र्धन कार्यक्रम समेत अलपत्र परेको छ । यसैगरी संघले गर्न सक्ने मध्येकै अगाडी सारेको एउटा प्रोजेक्ट कोशेली घर निर्माण दुई बर्षमा समेत हुन सकेन ।
यसो त एक हजार ७ सय भन्दा बढी व्यबसायी संगठित संघले आफ्ना मातहतका व्यबसायिलाई कोभिड विरुद्धको खोपको सुनिश्चितता समेत गर्न सकेको छैन। कोभिड पछि कति व्यवसायी पलायन भए, कति उद्योग धन्दा बन्द भए, यसले लेखनाथ क्षेत्रमा कस्तो प्रभाव पर्यो, राहतका प्याकेज के के हुन सक्छन र कुन निकायसँग लविङ गर्ने, लेखनाथका व्यवसायीले कति कर सरकारलाई तिर्छन्, यहाँको व्यवसायिक आम्दानी, प्रतिव्यक्ति आय, कोभिड पछिको व्यवसायिक सम्भावना समेतका बिषयमा समेत संघले कुनै प्रतिवेदन समेत तयार गर्न सकेको छैन ।
व्यवसायिक सदस्य शुद्धिकरण लगायतको काम समेत संघले गर्न नसक्दा आगामी निर्वाचनमा त्यस्ता सदस्यले समेत प्रभाव पार्ने देखिन्छ ।
डन न्युजको सहयोगमा।
Discussion about this post