सचिन रानाभाट/साउन २३, लेखनाथ । साविक लेखनाथ क्षेत्रको निजी क्षेत्रको छाता संस्था लेखनाथ उद्योग वाणिज्य संघको १३ औं महाधिवेशन नजिकिदै गर्दा चुनावी माहोल बढेको छ। भदौ १८ र १९ गते महाधिवेशनले नयाँ नेतृत्व चयन गर्नेछ। महाधिवेशन नजिकिएसँगै विभिन्न पदका आंकाक्षीहरुले चुनावी अभियान सुरु गरेका छन् ।
बर्तमान कार्यसमितिका पदाधिकारी हरुको एक एक तह बढुवा हुने गरि उम्मेदवारको चर्चा देखिन्छ।
अध्यक्ष पदमा बर्तमान कार्यसमितिका वरिष्ठ उपाध्यक्ष छत्रधर आत्रेय बलियो दावेदार मानिन्छन् । अध्यक्ष पदका एकमात्र आंकाक्षी रहेकोले नेतृत्व सर्वसम्मत हुन सक्ने सम्भावना रहेको व्यवसायीहरु बताउँछन् ।
अन्य पदमा भने आकांक्षी धेरै भएकाले निर्वाचन हुने सम्भावना बढी रहेको छ ।
वरिष्ठ उपाध्यक्षमा बर्तमान कार्यसमितिका प्रथम उपाध्यक्ष बिनोद श्रेष्ठ तथा अघिल्लो कार्यसमितिका महासचिव भरत कुमार अधिकारी बिच प्रतिष्पर्धा हुने देखिन्छ। आगामी अध्यक्षको रुपमा प्रमुख दावेदार हुने वरिष्ठ उपाध्यक्ष पदमा बर्तमान महासचिव गोपिचन्द्र बास्तोलालाई भिडाउन सक्ने श्रोतले बताएको छ।
त्यस्तै प्रथम उपाध्यक्षमा राजेन्द्र ओझाको चर्चा छ भने द्वितीय उपाध्यक्षमा शैलेन्द्र मोहन भट्टराई तथा गोपिचन्द्र बास्तोलाको चर्चा रहेको छ। बास्तोलाले जता पल्ला भारी हुन्छ त्यतै उम्मेदवारी दिने श्रोत बताउँछ ।
यता महासचिव पदमा भने बर्तमान उपमहासचिव उपेन्द्र सुवेदी राजुको दावेदारी देखिन्छ। यधपी जानुका अधिकारी भने उपमहासचिव पदमा उठ्ने श्रोतले बताएको छ ।
सबैभन्दा धेरै उम्मेदवार आकांक्षी रहेको कोषाध्यक्ष पदमा तिनपटक सदस्य रहेकी मेनुका श्रेष्ठको बलियो दावेदारी रहेको छ। श्रेष्ठ संग प्रतिष्पर्धामा भिम बहादुर बिक काईला, धिरज कुमार श्रेष्ठ, भरत ओझा तथा रामजी पौडेलको समेत चर्चा छ। बर्तमान कार्यसमिति सदस्य तथा कर्माचार्य ग्रुपका प्रतिनिधि रहेका बिक्रम कर्माचार्य पनि कोषाध्यक्ष पदमा आकांक्षी देखिन्छन् । उनलाई पनि बलियो उमेदवारका रुपमा हेरिएको छ। सदस्य पदमा भने यसपाली धेरै नयाँ अनुहार देखिने निश्चित छ।
कोभिड महामारीपछि कति व्यबसायी पलायन भए, कति उद्योग तथा ब्यबसाय बन्द भए, कोभिड पछि व्यबसायीका समस्या के छन् भनेर आज सम्म संघले केही नगरेको व्यबसायी गुनासो गर्छन् । यस अघि संघले हरेक बर्ष महोत्सव संगै २/४ ओटा गोष्ठी संचालन बाहेक ब्यबसायिको हक हितका काम प्राय कम नै छन्। महानगर, प्रदेश र संघले संयुक्त लगानी गरेको कृषि उपज केन्द्र उद्घाटन पछि अलपत्र बनेको छ ।
अध्यक्ष संगै पदाधिकारीमा वरिष्ठ उपाध्यक्ष, प्रथम उपाध्यक्ष, द्वितीय उपाध्यक्ष, महासचिव, उपमहासचिव र कोषाध्यक्ष रहने व्यवस्था छ । संस्थागत सदस्य १ जना, एसोसिएसन सदस्य १ जना, महिला आरक्षण २ जना र ८ जना खुल्ला सदस्यका लागि निर्वाचन हुनेछ । ३ जना सदस्य मनोनित हुनेछन् भने मनोनित आमन्त्रित सदस्य २ जना रहनेछन् । बढीमा ७ जना सल्लाहकार रहने व्यवस्था छ । संघमा हाल १ हजार ७ सय ५१ व्यबसायी आवद्ध रहेका छन्।
Discussion about this post