पोखरा, माघ २२ गते । १ अर्ब ६० करोड ५० लाखको लागतमा पोखराको लेखनाथस्थित तालचोक देखि बेगनासताल सम्मको सडक स्तरोन्नति हुने भएको छ । प्रतिकिलोमिटर लागतको आधारमा यो सडक सबै भन्दा महँगो हुनेछ ।
विश्व बैँकको आर्थिक सहयोगमा बन्न लागेको सडकको डिपिआर समेत तयार भैसकेको पोखरामा बुधबार आयोजित कार्यशालामा जानकारी गराइएको हो । ३.२८ किलोमिटरको उक्त सडकचार लेनको हुनेछ । सडक दाँयाबायाँ साइकल ट्र्याक, पैदलमार्ग, व्यवस्थित नाला, हरियाली, व्यवस्थित पार्किङ र सडक सौर्यबत्ती राखिने प्रोजेक्ट इन्जिनियर नवराज बोहोराले जानकारी दिए । सडकमा आधुनिक प्रविधिको उच्चतम प्रयोग गरिने उनको भनाई थियो ।
पोखरा महानगरपालिकाका मेयर मानबहादुर जिसीले वर्षौदेखिको सपना पूरा हुन लागेको भन्दै उक्त सडक महानगरको नमुना र गौरवको सडकबन्ने बताए । लामो समयको प्रयासपछि विश्व बैकको सहयोगमा पोखरामा पहिलो काम हुन लागेको भन्दै मेयर जिसीले कुनै पनि हालतमा समयमै काम पूरा गर्नुपर्ने चुनौती रहेको बताए । निकै महँगो मुल्यमा बन्न लागेको उक्त सडक निर्माणपछि बेगनासताल क्षेत्रको पर्यटकीय सम्भावना समेत बढेर जाने उनको भनाई छ ।
बाटो विस्तार गर्ने क्रममा खानेपानी, विद्युत पोल र टेलीफोनका तार स्थानान्तरणको कार्यमा सम्बन्धित कार्यालयहरुले महानगरको समन्वयमा गर्नुपर्नेछ । उक्त क्षेत्रमा सडक विस्तार हुँदैछ भन्ने जानकारी पाउँदा पाउँदै विद्युतका पोल गाड्ने लगायतका कार्य जारी रहेको भन्दै मेयर जिसीले समन्वयको अभावमा काम गर्न कठिन हुने बताए । महानगरले निर्माण गरेका संरचना प्रयोग गर्दा टेलीकम, विद्युत र खानेपानी समेतले महानगरलाई कर तिनुपर्ने उनले वताए ।
महानगरपालिकाका प्रमुख प्रशासकीय अधिकृत महेश बरालले आयोजनाको लागत नबढ्ने गरी काम गर्न आग्रह गरे । यस आयोजनामा शहरी विकास मन्त्रालयसंग सम्झौता गरेर कार्य अघि बढाउनुपर्ने आवस्यकता रहेको उनले बताए । महानगरको तर्फबाट गर्नुपर्ने काममा कुनै कसर बाँकी नराख्ने प्रतिवद्धता व्यक्त गर्दै बरालले निर्माण कार्य समयमै पूरा गर्नुपर्नेमा जोड दिए । बैदेशिक सहायतामा निर्माण गरिने सडक भएकाले निर्माण सम्पन्न हुदा डिपिआरमा तोकिए भन्दा गुणस्तरमा कुनै कमि आउन नहुने बताए ।
Discussion about this post