पौष १३ दुलेगौडा । तनहुँको शुक्लागण्डकी नगरपालिका र स्याङजाको हरिनाश गाउँपालिका जोड्ने सडक तथा क्याङ्दी खोला मोटरेबल पुलको आइतवार शिलान्यास गरिएको छ ।
शुक्लागण्डकी–१० र ११ स्थित जुडीबुफाटमा आयोजित कार्यक्रममा गण्डकी प्रदेशका भौतिक पूर्वाधार विकास मन्त्री रामशरण बस्नेतले शिलान्यास गरेका हुन् । उनले सडक र पुलको गुणस्तरलाई ख्याल गर्दै समयमै निर्माण सम्पन्न गर्न निर्माण कम्पनीलाई निर्देशन दिए । उनले हरिनाशका ग्रामिण सडकलाई आगामी वर्षमा क्रमिक रुपमा बजेट विनियोजन गरी कालोपत्रे गर्दै जाने प्रतिवद्धता जनाए ।
गाउँपालिका अध्यक्ष खिम नारायण मानन्धरले सडक र पुल निर्माण भएसँगै हरिनाशका सर्वसाधारणलाई दुलेगौंडा र पोखरा आवतजावत सहज हुने उल्लेख गरे । उनले गाउँवासीले गाउँमा उत्पादन भएका बस्तुले सहज रुपमा अब बजार पाउने विश्वास व्यक्त गरे ।
कार्यक्रममा गण्डकी प्रदेश विधायन समिति संयोजक मोहन रेग्मी, तनहुँ क्षेत्र नं. २ क की प्रदेश सभा सदस्य आशा कोइराला, स्याङजा क्षेत्र नं. १ ख का प्रदेश सभा सदस्य मिन गुरुङ, गाउँपालिका उपाध्यक्ष झन माया पराजुली, नेकपा शुक्लागण्डकी नगर कमिटी सचिव परशुराम भण्डारी, हरिनाश गाउँपालिका वडा नं. २ का अध्यक्ष परशुराम सिग्देल, शुक्लागण्डकी नगरपालिका वडा नं. ११ का अध्यक्ष दल बहादुर थापा लगायतले बोलेका थिए ।
शुक्लागण्डकी दुलेगौंडा–ढोरबाराही मार्ग जुडिफाँट चिसापानी हुदै हरिनाश गाउँपालिका केन्द्रसम्म कालोपत्रे र मोटरेबल पुल निर्माणका लागि गोल्डेन गुड बानीया जेभी हेटौंडाले मुल्य अभिवृद्धि करसहित ३२ करोड ६५ लाख ४७ हजार १ सय ४९ रुपैयामा सम्झौता गरेको हो ।
कुल १६ किलोमिटर कालोपत्रे सडक र ४० मिटरको पक्की पुल २ वर्षभित्र सक्नुपर्ने गरी सम्झौता भएको पूर्वाधार विकास कार्यालय स्याङजाका प्रमुख लक्ष्मी प्रसाद भण्डारीले जानकारी दिए ।
उनका अनुसार साढे ५ मिटर कालोपत्रे, सोल्जर ०.७५ मिट र १ मिटर नाली गरी कुल ८ मिटर सडक चौडाई हुने छ । हरिनाश गाउँपालिकाको आयोजना र शुक्लागण्डकी नगरपालिकाको सह–आयोजनामा सो कार्यक्रम भएको हो ।
Discussion about this post