हरि खरेल/दुलेगौडा । तनहुँको शुक्लागण्डकी नगरपालिका ४ दुलेगौडा बस्ने सुनिता थारु असार ११ गते सवारी दुर्घटनामा परेकी थिईन् । दुर्घटन पछि उपचारत अवस्थामा रहेकी थारु आर्थिक अवस्था अभावकै कारण घरमै सामान्य उपचारमा जीवन बिताउन बाध्य छिन ।
दुर्घटनाको क्रममा थारुको मुख र कम्मरमा गहिरो चोट पुगेको थियो । दुलेगौडाको दुर्गा मन्दिर अगाडी टाटा सुमोले ठक्कर दिँदा गम्भिर घाईते भएको उनका श्रीमान् भागिराम थारुले जानकारी दिए ।
दुर्घटना पछि थारुलाई उपचारको लागि पोखार स्थित फेवासीटी हस्पिटलमा लगिएको थियो । हस्पिटलले सामान्य उपचार पछि उनको उपचारको लागि काठमाडौ स्थित ट्रमा सेन्टरमा लगिएको थारुले बताए ।
अस्पताल लगिएता पनि केही समयको उपचार पछि उनलाई कोरोना पोजेटिभ देखीयो । कोरोना संक्रमण देखीएपछि ट्रमा सेन्टरबाट मेघा अस्पतालमा रिफर गरिदिएको थियो । केही समयपछि कोरोना नेगेटिभ देखिएपछि थारुलाई बिर अस्पतालमा रिफर गरिदिएको बताए ।
दुर्घटना पछि थारुको उपचारको लागि दुर्घटना गराउनेले ३ लाख रुपैया दिएको थियो । “जहाँ लगे नि लैजाउँ पैसा दिन्छु भन्नु भएको थियो सुरुमा” भागिरामले भने, “पछि धेरै गाह्रो भएता पनि पैसा दिनुभएन ।”
भागिरामले उपचारको लागि पैसा आवश्यक भएपनि दोषी चालकले धम्की दिने गरेको बताए । उनका अनुसार चालकले आफुले दिनुपर्ने पैसा दिइसकेको भन्दै अव दिन नसक्ने जवाफ फर्काउने गरेका छन् । जेल बस्न तयार रहेको भन्दै पैसा नदिने अडान लिएपछि श्रीमतीको उपचारका लागि निकै गाह्रो भएको उनले बताए ।
“सुरु सुरुमा गाडी निकाल्नभनेर मात्र फोन आउने गरेको थियो, पछि गाडी कसरी निस्कियो थाहा पनि भएन ।” उनले भने “पैसा नभएपछि अस्पतालमा उपचार गर्न नसकेर घरमा ल्याएको हुँ ।”
अहिले थारुको अवस्था कम्मर भन्दा तलको भाग नै नचल्ने भएको छ । उपचारको लागि आर्थिक अवस्था कमजोर रहेकै कारण थारु आफैले नै घाउको ड्रेसिङ गर्ने गरेको बताए । आर्थिक अवस्थाको कारण श्रीमतिको उपचार गर्न नसकेको हुदाँ सबै सामु सहयोगको अपेक्षा राखेका छन् ।
थारुको उपचारका लागि सहयोग जुट्दै
दुर्घटनाले ग्रस्त भएर घरैमा उपचारत अवस्थामा रहेको थारुको लागि शुक्लागण्डकी ४ दुलेगौडा बस्ने राजकुमारी अधिकारी र गुरुङ किराना पसलबाट घरखर्च र सामान्य मलम पट्टिको लागि २ हजार रुपौया आर्थिक सहयोग गरेका छन् ।
युवाहरुको समुह बनाई घरदैलो गर्दै आर्थिक रकम संकलन गर्न सके घाईते थारुको उपचारको लागि राहत पुग्ने हुने स्मृत फेन्मीको संञ्चालिका अधिकारीले बताईन् ।
Discussion about this post