दमौली । तनहुँबाट निर्वाचित भएका प्रतिनिधि र प्रदेश सभाका सांसदहरुले नेपाली काँग्रेसलाई विधि र प्रकृया नमिच्न आग्रह गरेका छन् । शुक्रबार दमौलीमा पत्रकार सम्मेलन गरि प्रतिनिधि सभाका तीन, राष्ट्रिय सभाका एक र प्रदेशसभाका चार सदस्यहरुले लोकतन्त्रको मुल्य र मान्यतालाई सम्मान गर्न काँग्रेसका नेता कार्यकर्ताहरुलाई आग्रह गरेका हुन् ।
केही दिन अघि एक मोटरेबल पुलको उद्घाटनको विषयलाई लिएर जिल्लामा परिस्थिती असामान्य बनेपछि सांसदहरुले संयुक्त रुपमा पत्रकार सम्मेलन गरेर आफुहरुको धारणा प्रस्तुत गरेका थिए ।
कार्यक्रममा सङ्घीय सांसद एवं नेपाल कम्युनिष्ट पार्टी (नेकपा) तनहुँका अध्यक्ष केदार सिग्देलले सङ्घीय सरकार मार्फत् निर्माण सम्पन्न भएको पुल सम्बन्धित मन्त्रालयलाई जानकारी नै नदिई उद्घाटन गर्नु गैरजिम्मेवारीपूर्ण कार्य भएको बताउनुभयो ।
निर्वाचनमा पराजित नेताहरुले योजना उद्घाटन गर्दै हिँड्ने र निर्वाचित जनप्रतिनिधिलाई जानकारी नदिने कार्यले लोकतन्त्रको खिल्ली उडाएको सिग्देलको भनाई थियो ।
सङ्घीय सांसद कृष्णकुमार श्रेष्ठले तनहुँको सम्पूर्ण विकास निर्माणको कामको जिम्मा नेकपाले लिने दावि गर्नुभयो । उहाँले आफुलाई विभिन्न आरोप लगाएर बदनाम गर्न खोजिएको भन्दै काँग्रेसका नेताहरुप्रति असन्तुष्टी ब्यक्त गर्नुभएको थियो । नेपाली काङ्ग्रेसका नेता प्रदिप पौडेलले स्रोत नखुलेको सम्पती भएको र ब्यापारी लगायत आरोप सहित सम्पती छानविन हुनपर्ने माग राखेको भन्दै आरोप प्रमाणित गर्न उहाँले चुनौती दिनुभयो ।
आफ्नो निर्वाचन क्षेत्रमा भएको कार्यक्रम गलत प्रकृयाबाट भएको दावि गर्दै साँसद श्रेष्ठले राष्ट्रिय ब्यक्ति सहभागी हुनु निन्दनीय र दुःखद कार्य भएको बताउनुभयो ।
राष्ट्रियसभा सदस्य भगवती न्यौपानेले जनताबाट निर्वाचित प्रतिनिधिलाई निषेध गरिनु गलत भएको बताउनुभयो । पत्रकार सम्मेलनमा सङ्घीय सांसद कलिला खान र गण्डकी प्रदेशसभा सदस्य रामबहादुर गुरुङले बलिदानीपूर्ण सङ्घर्षबाट प्राप्त उपलब्धीको रक्षा गर्ने मुख्य अभिभारा सवैको भएको उल्लेख गर्नुभयो ।
Discussion about this post