दुलेगौडा । पुल उद्घाटनको विषयमा उत्पन्न भएको विवादले उग्र रुप लिएपछि तनहुँको ब्यास नगरपालिकाको तालघरेबाट नेपालका काँग्रेसका बरिष्ठ नेता रामचन्द्र पौडेल सहित काँग्रेस कार्यकर्ताहरु पक्राउ परेका छन् ।
तनहुँ जिल्ला प्रहरी कार्यालयले नेता पौडेल सहित जिल्लाका कार्यवाहक अध्यक्ष जितप्रकाश आले, जिल्ला सदस्य सुरज लम्साल, मानवअधिकार संघ तनहुँकी अध्यक्ष कल्पना लम्साल लगायतलाई नियन्त्रणमा लिएको हो ।
प्रहरीको गिरफ्तारीमा पर्नुभएका बरिष्ठ नेता पौडेलले मानव अधिकारको चिरहरण भएको बताउनुभएको छ । बलपुर्वक आफुहरुलाई प्रहरी र प्रशासनले गिरफ्तार गरेको उहाँले बताउनुभयो । “म माथि लाठि समेत प्रहार भयो, शरिरमा असर परेको छ” उहाँले भन्नु भयो “देशमा सत्ताको दुरुपयोग भएको छ ।” नेता पौडेलले सत्तामा हुनेहरुले अधिनायकबाद लागु गर्न खोजेको आरोप समेत लगाउनुभयो ।
जिल्ला प्रशासन कार्यालयले जिल्लामा निर्माण भएको संरचनाको उद्घाटन नगर्न अनुरोध गरेको भएता पनि काँग्रेस र सम्वद्ध भातृसस्थाहरुको जोडबलमा उद्घाटनको तयारी भएको थियो । यस अघि नै जिप्रकाले कार्यक्रम स्थगित गर्न परिपत्र गरेको थियो ।
तालघरेमा पुल उद्घाटनका लागि पुगेका पौडेल सहित काँग्रेसका नेता कार्यकर्ताहरुलाई युवासंघका कार्यकर्ताहरुले रोक्ने प्रयास गरेका थिए । सोही क्रममा केही बेर झडप समेत भएको थियो ।
जिल्ला प्रहरी कार्यालय तनहुँका सुचना अधिकारी प्रनि शिवराज क्षत्रीले निषेधज्ञा तोडेकाले उहाँहरुलाई नियन्त्रणमा लिइएको जनाउनुभयो । प्रशासनले सम्भाब्य दुर्घटना रोक्ने सम्वन्धित स्थानमा निषेधज्ञा जारि गरेको थियो ।
Discussion about this post