दुलेगौडा । तनहुँको म्याग्दे गाउँपालिका वडा नं.१ गुणादी स्थित बाराही सामुदायिक वन उपभोक्ता समुहले समुहमा आवद्ध सदस्यहरु मध्य ग र घ वर्गका विपन्न समुदायलाई सामुहिक खेतीमा जोड्न थालेको छ ।
व्यक्तिको जग्गा बन्धकीमा खरिद गरी १३ जना उपभोक्तालाई सामुहिक धान खेती गर्ने जिम्मा दिएको छ । २० रोपनी क्षेत्रफलको खेत र ४ लाख रुपैयाँमा बन्धकी गरी समुहका गरिव वर्गका उपभोक्ताहरुलाई सामुहिक खेतीमा जोड् दिएको समुहका अध्यक्ष मुक्तिनाथ खनालले जानकारी दिनुभयो । तीन वर्ष अगाडिदेखि नै व्यक्तिको जग्गा बन्धकीमा खरिद गरी समुहको नियम र कार्ययोजना अनुसार उपभोक्तालाई सामुहिक खेती गर्न प्रोत्साहन दिने गरेको बताउनुभयो । वन समुहमा आवद्ध विपन्न समुदायलाई सामुहिक खेतीमा अवद्ध गराउन निवेदन आव्हान गर्ने र सोही अनुसार १२ जनाको एक समुहलाई एक वर्षसम्म उक्त खेतमा सामुहिक खेती गर्न दिने गरिएको अध्यक्ष खनालले बताउनुभयो ।
‘समुदायिक वनमा आश्रीत सबै उपभोक्ताले लाभ लिन पाउनुपर्छ र विपन्न वर्गको उत्थानका लागि पनि समुहले काम गर्नुपर्छ’, अध्यक्ष खनालले भने, ‘वन समुहले गरेको आम्दानीबाट ४ लाख रुपैयाँको लागतमा करिब २० रोपनी क्षेत्रफलको खेत ५ वर्षका लागि बन्धकी गरी खरिद गरेका छौं । यो खेतमा वर्षमा तीन खेती गर्ने गरी वाषिर्क रुपमा लक्षित वर्गका कृषकहरु पहिचान पश्चात सामुहिक खेती प्रणाली अगाडि बढाउँदै आएका छौं ।’ उँहाले भन्नुभयो ।
गत वर्ष ८४ मुरी ६ पाथी धान र करिब ६० हजार रुपैयाँ भन्दा बढिको पराल बिक्री विरतण गरेको अध्यक्ष खनालले जानकारी दिनुभयो । खनालका अनुसार यस वर्ष धानखेती राम्रो भएको हुँदा उत्पादन वृद्धि हुने र कृषक उपभोक्ताहरुले राम्रो प्रतिफल पाउने आशा राख्नुभएको छ । कृषकहरुले यस खेतमा चैते धान, वर्खेधान तथा हिउँदको समयमा गहुँ, मुसुरो, केराउ, आलु जस्ता खेती गर्नुपर्ने नियम समुहको छ । यो खेतमा खेती गर्नका लागि विपन्न समुदायले ५० रुपैयाँमा निवेदन दर्ता गर्नुपर्ने र धरौटी बापत एक हजार रुपैयाँ जम्म गर्नुपर्ने व्यवस्था छ ।
१३ जनाको समुहले उत्पादन गरेको धान विहीबार डिभिजन वन कार्यालय तनहुँका प्रमुख कोमलराज काफ्लेले धान काटेर यस वर्षको बर्खेधान खेती थन्काउने कार्यको शुभारम्भ गरेका थिए । सामुदायिक वनले सञ्चालन गरेको यो अभियान गरिवी न्यूनिकरणको एक उदाहरणीय र पवित्र कार्य भएको काफ्लेले बताउनुभयो ।
Discussion about this post