कार्तिक १८, दुलेगौडा । विभिन्न मुद्दामा परि फरार भएका २६ व्यक्तिहरुलाई जिल्ला प्रहरी कार्यालय तनहुँले पक्राउ गर्न सफल भएको छ ।
पक्राउ हुनेमा म्याग्दे गाउँपालिका–३ बस्ने ३१ बर्षीय अमृत भट्टराई, शुक्लागण्डकी नगरपालिका–३ र ८ मा बस्ने क्रमशः सन्तोष खंग र सन्तोष गौतम (माईकल), भानु नगरपालिका–६ बस्ने बिमल थापा मगर र निजकी श्रीमती सञ्जु थापा मगर लगायत विभिन्न मुद्दामा परेका २१ गरी २६ जना रहेको जिल्ला प्रहरी कार्यालय तनहुँका प्रहरी नायब उपरीक्षक युवराज तिमिल्सेनाले जानकारी दिनुभयो ।
प्रहरीले आइतबार बैकिङ कसुर मुद्दामा फरार रहेको म्याग्देका अमृत भट्टराईलाई पक्राउ गरेको हो । उच्च अदालत पाटनले विसं २०७६ चैत २ गते सात दिन कैद र ६ लाख ६७ हजार रुपैयाँ जरिवाना हुने गरी फैसला गरेको भएको थियो । उच्च अदालतबाट तोकिएको कैद तथा जरिवाना भुक्तान नगरी फरार रहेका निज भट्टराईलाई प्रहरीले पक्राउ गरेको जिप्रका तनहुँले जनाएको छ ।
यसैगरी साधारण मुद्दामा परि फरार हुने शुक्लागण्डकी ३ का खंग र वडा नं. ९ का गौतम दुबैलाई तनहुँ जिल्ला अदालतले विसं २०७६ असार ८ गतेको फैसलाले खंग लाई दुई वर्ष दुई दिन कैद, रु २२ हजार ५०० जरिवाना र गौतमलाई दुई वर्ष दुई महिना चार दिन कैद र रु २२ हजार ५ सय जरिवना ठहर गरेको थियो । दुवै व्यक्ति अदालतबाट फैसला पश्चात तोकिएको कैद र जरिवाना भुक्तान नगरी फरार रहेकाहरुलाई पक्राउ गरेको प्रहरी नायब उपरीक्षक तिमिल्सेनाले जानकारी दिनुभयो ।
त्यसैगरी जारी मुद्दामा परेका भानु नगरपालिका–६ बस्ने बिमल थापा मगर र निजकी श्रीमती सञ्जु थापा मगरलाई तनहुँ जिल्ला अदालतको विसं २०७१ मङ्सिर ७ गतेको फैसलाले जनही १/१ महिना कैद र एक हजार जरिवाना तोकिएका थियो । उक्त फैसालापछि फरार भएपछि प्रहरीले पक्राउ गर्न सफल भएको छ ।
त्यस्तै करकाप मुद्दामा फरार आठ जना, लिखत बेइज्जती मुद्दामा फरार छ जना, लागुऔषध मुद्दामा फरार एक, गाली बेईज्जती मुद्दामा फरार दुई जना, जारी मुद्दामा फरार एक, नाता कायम मुद्दामा फरार एक, सम्बन्धविच्छेद मुद्दामा फरार एक र जारी मुद्दामा फरार एक जनालाई पक्राउ गरेको प्रहरीले जनाएको छ ।
जम्मा २६ जना व्यक्तिहरुलाई मिति आइतबार जिल्ला प्रहरी कार्यालय तनहुँ तथा मातहत प्रहरी इकाई कार्यालयहरुबाट पक्राउ गरी तोकिएको जम्मा चार वर्ष चार महिना १३ दिन कैद र जम्मा ७ लाख १६ हजार ६२० रुपैयाँ जरिवाना भुक्तानको लागि तनहुँ जिल्ला अदालतमा उपस्थित गराइएको हो ।
Discussion about this post