बेगनास,
साउन ६ – पोखराको पर्यटकीय तथा सांस्कृतिक क्षेत्र लेखनाथको प्राकृतिक सौन्दर्य र धार्मिक सम्पदाहरूलाई समेटेर तयार पारिएको नयाँ नेपाली भजन ‘लेखनाथको महिमा’ सार्वजनिक भएको छ। बेगनासताल भजन समूहको आधिकारिक युट्युब च्यानलमार्फत उक्त भजन सार्वजनिक गरिएको हो।
स्थानीय कला, संस्कृति र धार्मिक पर्यटन प्रवर्द्धनका लागि पोखरा महानगरपालिका वडा नं. ३१ कार्यालयको आर्थिक सहयोगमा यो भजन तथा भिडियो निर्माण गरिएको हो।
यस भजनमा शब्द रचना हरिप्रसाद ढकालको रहेको छ भने दृश्य निर्माणतर्फ सञ्जीव फिल्मस् का सञ्जीव घिमिरे र सुशील थापाले निर्देशन तथा छायाङ्कन गर्नुभएको छ। लामो समयदेखि लेखनाथ क्षेत्रको प्रचारप्रसार, सुन्दर दृश्य तथा वृत्तचित्र निर्माणमा निरन्तर क्रियाशील रहँदै आएको सञ्जीव फिल्मस्ले यस भजनमार्फत पनि यस क्षेत्रको सौन्दर्यलाई कलात्मक रूपमा प्रस्तुत गरेको छ।
भजनमा लेखनाथ क्षेत्रभित्र रहेका ऐतिहासिक, धार्मिक तथा प्राकृतिक स्थलहरूको विस्तृत वर्णन गरिएको छ। विशेष गरी कवि शिरोमणि लेखनाथ पौड्यालको जन्मथलो अर्चले गाउँको स्मरण गर्दै लेखनाथका सात तालहरू—बेगनास, रुपा, खास्टे, निउरेनी लगायतका जलाशय र वरपरका नदीहरूको सौन्दर्यलाई प्रस्तुत गरिएको छ।
यसैगरी ठुलाकोटको भैरवथान, चक्रदेवी, मनकामना, कालिका मन्दिर, शिशुवाको चन्द्रकाली, पचभैया तथा लामागाउँका गुम्बा, सीता गुफा, बेगनासकोट र तालबेसीको जलेश्वर महादेवजस्ता प्रसिद्ध धार्मिक तथा पर्यटकीय स्थलहरूलाई भजनमार्फत उजागर गरिएको छ। बेगनासतालमा हुने नियमित आरती र स्थानीय माझीकुनाको रमणीय वातावरणलाई समेत भिडियोमा सुन्दर ढङ्गले समेटिएको छ।
स्थानीय सरकारको सहयोग, सांस्कृतिक समूहको पहल र सञ्जीव फिल्मस्को प्राविधिक योगदानमा तयार पारिएको यो भजनले लेखनाथ क्षेत्रको चिनारीलाई अझ व्यापक बनाउन महत्त्वपूर्ण योगदान पुर्याउने विश्वास लिइएको छ।
Discussion about this post