लेखनाथ ६ फागुन
नेपाली कांग्रेस कास्की क्षेत्र नम्बर १ का उम्मेदवार तिलक रानाभाटले आफ्नो घरदैलो अभियानलाई तीव्र पारेका छन्। उनले कास्की क्षेत्र नम्बर १ अन्तर्गत पोखरा महानगरपालिका वडा नम्बर २८ का विभिन्न ठाउँहरूमा घरदैलो तथा मतदाता भेटघाट कार्यक्रमलाई सम्पन्न गरेका छन्। मतदाता भेटघाट कार्यक्रममा बोल्दै उम्मेदवार रानाभाटले अबको सरकार नेपाली कांग्रेसको नेतृत्वमा बन्ने र त्यसको नेतृत्व गगन थापाले गर्ने हुँदा समृद्ध नेपाल निर्माणको परिकल्पना पुरा गरिने उद्घोषका साथ नेपाली कांग्रेस अगाडि बढेको बताएका छन्।
सोही कार्यक्रममा बोल्दै नेपाली कांग्रेसका केन्द्रीय सदस्य कृष्णबहादुर केसीले सचिएको र सुध्रिएको कांग्रेस नै विकासको अन्तिम विकल्प रहेको उद्घोष गरेका छन्। पोखरा महानगरपालिका वडा नम्बर २८ का वडाध्यक्ष श्रीकृष्ण लामिछानेले वडाको विकाससँगै अब कांग्रेसको नेतृत्वमा देशको विकास तीव्र रुपमा अगाडि बढ्ने बताएका छन्। नेपाली कांग्रेसका महासमिति सदस्य विकास लामा गुरुङले कास्की क्षेत्र नम्बर १ को विकासमा अब सबै एक भएर हातेमालो गरेर अगाडि बढ्नुपर्ने बताएका छन्।
घरदैलो कार्यक्रम अन्तर्गत वडा नम्बर २८ का काफलघारी, माझठाना, रैकर, स्याङखुदी लगायतका ठाउँहरूमा घरदैलो तथा मतदाता भेटघाट कार्यक्रम सम्पन्न भएको हो। नेपाली कांग्रेस पोखरा २८ का सभापति विश्वरमण अधिकारीको अध्यक्षतामा सम्पन्न कार्यक्रममा कास्की जिल्ला उपसभापति रामबाबु भण्डारी, नेपाली कांग्रेसका नेता वीरबहादुर बुढाथोकी, विद्यार्थी नेता निरोज लामिछाने, स्थानीय नेताहरू सागर अधिकारी टिकाराम लामिछाने लगायतले बेलुका साथै कार्यक्रमको सञ्चालन वडा सचिव जीवन तिवारी र राजेश भण्डारीले गरेका थिए।
Discussion about this post