लेखनाथ, १६ पुस । श्रम, रोजगार,सामाजिक सुरक्षा तथा खानेपानी मन्त्री राजेन्द्र सिंह भण्डारीले प्रविधि–मैत्री व्यवस्थापन मार्फत संक्रमणकाललाई अवतरण र रूपान्तरण गर्न आवश्यक रहेको बताएका छन् ।
लेखनाथ खानेपानी उपभोक्ता संस्थाले बुधबार मन्त्री भण्डारीको स्वागत सन्मानमा राखेको कार्यक्रममा बोल्दै खानेपानीको पहिलो उपयोगिताको सिद्धान्तलाई आत्मसात् गर्दै स्मार्ट (प्रविधि–मैत्री) व्यवस्थापन मार्फत वर्तमान अवस्थामा राज्य तथा संघ–संस्थाको सञ्चालन गर्नुपर्ने आवश्यकता औँल्याए।
उनले मुलुकले १० वर्षे जनयुद्धभन्दा २४ घण्टामा ठूलो क्षति व्यहोर्नुपरेको उदाहरण दिँदै नीतिगत रूपमा प्रविधि–मैत्री द्वन्द्व समाधान, युवालाई स्वदेशमै रोजगारी उपलब्ध गराउने सरकारको उद्देश्य रहेको बताए । नवयुवालाई आक्रोश र कुण्ठामा होइन, राष्ट्र निर्माणमा केन्द्रित गर्नुपर्नेमा जोड दिँदै संक्रमण अवस्थालाई अवतरण र रूपान्तरण गर्न आवश्यक रहेको उल्लेख गरे । जनताको सर्वोत्तम हित बाहेक अर्को कुनै उद्देश्य नभएको बताउँदै सबैलाई सार्वजनिक हितमा लाग्न आग्रह गरे ।
मन्त्री भण्डारीले आफू मन्त्रीको पदावली बाहेक अन्य कुनै कार्यमा संलग्न नभएको, यस संस्थामा पहिलो पटक आएको र भ्रमण नितान्त व्यक्तिगत भएको स्पष्ट पारे । उनले समस्या समाधान, रणनीति र नीतिगत रूपमा खानेपानीलाई पहिलो प्राथमिकतामा राख्नुपर्ने बताउँदै समस्यामा परेका जनताको वास्तविक आवश्यकता पहिचान गरी सेवामुखी वर्गीकरणका आधारमा मानवीय तथा संवेदनशील ढंगले काम गर्न आग्रह गरे ।
उक्त कार्यक्रममा लेखनाथ खानेपानी उपभोक्ता संस्थाका अध्यक्ष मुरारी शर्माले विभिन्न समयमा मन्त्रीहरू समक्ष गुनासो राख्दै आएको उल्लेख गर्दै व्यवसायी सरह कर तिर्न बाध्य उपभोक्ता संस्थालाई प्यान र भ्याटमा सेवामुखी छुटको व्यवस्था हुनुपर्ने माग गरे । उनले आफुहरु कुल महसुलको १ प्रतिशत नेपाल सरकारलाई दिन तयार भएको तर यो सस्था नाफा मुखी नभई सेवा मुलक सस्था भएकाले आम्दानीको २५ प्रतिशत कर लगाउने नेपाल सरकारको निर्णयलाई पुनरावलोकन गर्नुपर्ने, विद्युत् महसुलमा ५० प्रतिशत छुट कार्यान्वयन हुनुपर्ने, टिडिएफबाट १ प्रतिशत ब्याजदरमा ऋण लिएर ७५ प्रतिशत लगानी गरेका खानेपानी उपभोक्ता संस्थालाई ५ प्रतिशतमा ऋण लगाइने व्यवस्था लगायतका समस्या समाधानमा सरकारको ध्यान जानु पर्ने सुझाव राखे ।
कार्यक्रममा संस्थाका गतिविधी र भावी कार्ययोजनालाई श्रव्य–दृश्य मार्फत कार्यालय प्रमुख शिव अमात्यले जानकारी गराएका थिए । साथै उनले हराएको पानी पत्ता लगाउने प्रविधि, नेपालमै पहिलो पटक खानेपानी बीमा, स्मार्ट पानी वितरण प्रणाली, अनलाइन भुक्तानी, मूलदेखि धारासम्म शुद्ध खानेपानी आपूर्ति, जलवायु अनुकूलित वितरण प्रणाली, आधुनिक प्रयोगशालाको स्थापना तथा अन्तर्राष्ट्रिय संघ–संस्थाबाट प्राप्त प्रविधि र मर्मत सहयोगबारे प्रस्तुति दिएका थिए ।
कार्यक्रममा धन्यवाद ज्ञापन संस्थाका उपाध्यक्ष पुष्पकलम ढुंगानाले गरेका थिए भने कार्यक्रम सञ्चालन राष्ट्रिय साना सहरी खानेपानी तथा सरसफाई उपभोक्ता संस्थाकी कोषाध्यक्ष तथा सस्थाकी सचिव नारायणी भट्टराई (रक्षा) ले गरेकी थिइन् ।
Discussion about this post