लेखनाथ, २६ मंसिर । रोट्रयाक्ट क्लव अफ लेखनाथले आयोजना गरेको ‘डल्फिन मेगा स्पिच’ सिजन–१ को उपाधी डायमण्ड मावि पोखरा–२७, तालचोककी छात्रा प्रमिसा बानियाँले हात पारेकी छिन । ‘पोखरामा पर्यटकको सम्भावना र चुनौती’ विषयमा आयोजना गरिएको उक्त प्रतियोगितामा साविक लेखनाथका एक दर्जनभन्दा बढी निजी तथा सामुदायिक विद्यालयबाट सहभागी प्रतिष्पर्धिहरुलाई पछि पार्दै बानियाँले उपाधी सँगै नगद रु १० हजार प्राप्त गर्न सफल भईन ।
प्रतियोगितामा अमरसिद्ध नमुना माविका प्रतिक सुवेदीले द्धित्तीय स्थान हासिल गर्दै नगद रु ५ हजार, त्रिभुवन शान्ति उच्च माविका टंक बहादुर चर्मले तृतीय स्थान हासिल गर्दै नगद रु ३ हजार र डायमण्ड माविकै सुजल जिसीले सान्त्वना स्थाल हासिल गर्दै नगद रु २ हजार पुरस्कार प्राप्त गर्न सफल भएका छन । प्रतियोगितामा रोट्रयाक्ट संयोजक सुवास सिग्देल, डा. दिपमाला श्रेष्ठ तथा प्रकाश रेग्मीले निर्णायकको भुमिका निर्वाह गरेका थिए ।
यस अघि कार्यक्रमको उद्घाटन गर्दै गण्डकी विश्वविद्यालका कुलपति प्रा. डा. इन्द्रप्रसाद तिवारीले विद्यार्थीहरूलाई पर्यटन, समाज परिवर्तन र सिर्जनशील अभिव्यक्तिका क्षेत्रमा सक्रिय हुन प्रेरणा दिँदै पोखराको पर्यटन सम्भावनालाई शैक्षिक उर्जासँग जोड्न आवश्यक रहेको बताएका थिए ।
उक्त अवसरमा कलेजका क्याम्पस प्रमुख यदुराज आचार्य, अध्यक्ष सुमन भट्टराई, समाजसेवी राजेन्द्रमणि लामिछाने, डल्फिन एजुकेशनका प्रतिनिधिहरू रहेका थिए । उनीहरूले पोखरामा पर्यटन विकास, चुनौती तथा अवसरका विषयमा गहन विचार प्रस्तुत गरेका थिए भने कलेजका छात्राहरुले स्वागत नृत्य प्रस्तुत गरेका थिए ।
कार्यक्रममा स्वागत मन्तव्य व्यक्त गर्दै रोट्रयाक्ट क्लव अफ लेखनाथका अध्यक्ष कमल गौतमले लेखनाथका विद्यालयहरू भोलीको समाज परिवर्तनका वाहक, क्षमता अभिवृद्धि र नेतृत्व विकासका आधार भएको भन्दै प्रतिस्पर्धाबाट प्राप्त नेतृत्वदक्षता समाजकै लाभमा परिणत हुने विश्वास व्यक्त गरेका थिए ।
विद्यार्थीको आत्मविश्वास, मौलिकता र नेतृत्व क्षमतामा उल्लेखनीय योगदान पुग्ने विश्वास लिईएको उक्त कार्यक्रमको सञ्चालन रोट्याक्टका कार्यक्रम संयोजक नविन अधिकारीले गरेका थिए ।
Discussion about this post