लेखनाथ ईन्जिनियर्स सोसाइटीको तदर्थ समिति गठन, शुभकामना आदानप्रदान

लेखनाथ, ६ असोज ।
लेखनाथ क्षेत्रलाई आफ्नो कार्यक्षेत्र बनाउँदै विकासमा योगदान पुर्‍याउने उद्देश्यका साथ पोखरा–२७, तालचोकस्थित लेखनाथ ईन्जिनियर्स सोसाइटीले नेपालीहरूको महान चाड विजयादशमी, शुभ दीपावली तथा छठ पर्वको अवसरमा शुभकामना आदानप्रदान कार्यक्रम सम्पन्न गरेको छ ।
कार्यक्रम सभापति इन्जिनियर विवेक बरालको सभापतित्वमा तथा इन्जिनियर सरोज सुवेदीको सञ्चालनमा सम्पन्न भएको थियो । कार्यक्रममा पोखरा विश्वविद्यालयका प्राध्यापक इ. शंकर लामिछानेले तदर्थ समिति गठन गरी लेखनाथ क्षेत्रको समग्र विकासमा ईन्जिनियरहरू सक्रिय हुनुपर्नेमा जोड दिनुभयो । इ. सन्जीव थापाले एकतामै शक्ति रहेको भन्दै साझा उद्देश्यमा अघि बढ्नुपर्ने सुझाव दिनुभयो ।

त्यस्तै, पोखरा महानगरपालिकाका इ. रविचन्द्र घिमिरेले सबै क्षेत्रलाई समेटी अघि बढ्नुपर्नेमा जोड दिनुभयो भने इ. राममणि अधिकारीले संस्थालाई आधिकारिक रूपमा दर्ता गरी नेपाल ईन्जिनियरिङ महासंघमा आबद्ध गराउन सुझाव दिनुभयो ।
कार्यक्रमले लेखनाथ ईन्जिनियर्स सोसाइटीको तदर्थ समिति गठन गरी लोगो, छाप, लेटरप्याड तथा विधान निर्माण गर्ने र आधिकारिक दर्ता प्रक्रियामा अघि बढ्ने निर्णय गरेको छ ।
तदर्थ समितिको संयोजकमा इ. सरोज सुवेदी, सह–संयोजक इ. अनिल ढुङ्गाना, सचिव इ. अनुप पौडेल, सह–सचिव इ. निलिसा राजभाट, कोषाध्यक्ष इ. रविजन वास्तोला तथा सदस्यहरूमा इ. विवेक बराल र आदित्य सापकोटा चयन भएका छन् ।