कामना सेवा विकास बैंक लिमिटेडले आफ्नो संस्थागत सामाजिक उत्तरदायित्व (CSR) कार्यक्रम अन्तर्गत जेन जीको आन्दोलनका क्रममा क्षति पुगेका विभिन्न सरकारी कार्यालयहरूलाई सहयोग प्रदान गरेको छ।
बैंकले पोखरा महानगरपालिका–३० नं वडा कार्यालयलाई आवश्यक फर्निचर हस्तान्तरण गरेको छ। आन्दोलनका क्रममा कार्यालयका सम्पूर्ण उपकरण र फर्निचर जलेर नष्ट भएपछि बैंकको ढुङ्गेपाटन शाखा प्रमुख लक्ष्मी ढकालले वडाध्यक्ष दुर्गा प्रसाद सुवेदीलाई टेबल–कुर्सी हस्तान्तरण गरेकी हुन्। कार्यक्रममा वडाध्यक्ष सुवेदीले कार्यालय पुनः सञ्चालनमा ल्याउन सहयोग गरेकोमा बैंकलाई धन्यवाद दिँदै अन्य सरोकारवालालाई पनि पुनर्निर्माणमा सहभागी हुन आह्वान गरे।
यस्तै, बैंकले जिल्ला प्रहरी कार्यालय, कास्कीलाई कम्प्युटर र प्रिन्टर हस्तान्तरण गरेको छ। आन्दोलनका क्रममा सम्पूर्ण भौतिक संरचना जलेर कार्यालय सञ्चालन असम्भव भएको अवस्थामा तत्काल आवश्यक सामग्री हस्तान्तरण गर्दै बैंकका पोखरा क्षेत्र प्रमुख शिवकुमार ढकालले प्रहरी कार्यालयका डिएसपी हरिबहादुर बस्नेतलाई सामग्री बुझाएका हुन्।
कामना सेवा विकास बैंकले आन्दोलनका कारण क्षतिग्रस्त भएका विभिन्न वडा कार्यालय, मालपोत कार्यालय, प्रहरी कार्यालयलगायतका सार्वजनिक संस्थामा मर्मत–सम्भार, पुनर्निर्माण तथा आवश्यक सामग्री सहयोग गर्न सुरु गरेको जनाएको छ। बैंकले सामाजिक उत्तरदायित्वअनुसार सार्वजनिक संरचना पुनः सञ्चालनमा ल्याउन निरन्तर योगदान गर्ने प्रतिवद्धता व्यक्त गरेको छ।
Discussion about this post