जातीय विभेद गरेको आरोपमा पीएनका विभागीय प्रमुख ४ दिनमै बर्खास्त

पोखरा । पोखराको पृथ्वीनारायण (पीएन) क्याम्पसका व्यवस्थापन संकायका शिक्षक डा. देविलाल शर्मालाई जातीय दुर्व्यवहार गरेको आरोप लागेको छ । व्यवस्थापन संकायतर्फ एमबिए फाइनन्स विषयको शैक्षिक अवलोकन भ्रमणका विद्यार्थी अमन परियारलाई जातीय दुव्यर्वहार गरेको लागेको हो ।

उक्त विषयमा स्वतन्त्र विद्यार्थी युनियन, दलित विद्यार्थी समाज र तराई कानुन विद्यार्थी मञ्चले विज्ञप्ती जारी गर्दै घटनाका बारेमा विरोध जनाएका छन् भने क्याम्पसले अनुसन्धान विभागको विभागीय प्रमुख पदबाट हटाइसकेको छ । उनी ४ दिनअघि मात्रै उक्त पदमा नियुक्त भएका थिए ।

उनीहरुले जातीय विभेद गर्ने शिक्षकलाई हदैसम्मको कारवाही गर्न माग गरेका छन् ।

विद्यार्थीले आपत्ति जनाउँदै गर्दा शिक्षक शर्माले ‘शैक्षिक प्रमाण पत्र पोखरामा नबिक्ने गरी पोखराबाट नै गायब गर्छु, एनक्यु लगाई तलाईं कहीं न कतैको बनाइदिन्छु’ भनी धम्कीसमेत दिएका हुन् ।

आरोप लागेका शिक्षक देविलाल शर्मालाई सम्पर्क गर्न खोज्दा उनको मोबाइन स्विच अफ गरिएको छ ।

घटना के हो ?

पिएन क्याम्पसका व्यवस्थापन संकायतर्फ एमबिए फाइनन्सका विद्यार्थी वैशाख २५ गते ५ दिने शैक्षिक अवलोकन भ्रमणमा निस्किएका थिए । २० जना विद्यार्थीसहित भ्रमण गएको टोली सोमबार पोखरा फर्किदै थियो । सिन्धुलीमा आउँदा बस बिग्रियो । सबै जना खाना खाजा खानतिर लागे र चालक भने बस बनाउने मिस्त्री खोज्नतर्फ लागे । सबै साथीहरु तितरवितर भएका थिए ।

लामो समयसम्म पनि कुनै जानकारी नआएपछि अमनसहितका केही साथीहरु अरु साथीहरु भएको ठाउँतिर लागे । उक्त ठाउँमा शिक्षकहरु पनि थिए । अमनले त्यहाँ भएका साथीलाई ‘हामीलाई किन नबोलाएको’ भने । तर, शिक्षक शर्माले जवाफ फर्काए । ‘लामो समयसम्म फोन नउठेपछि साथीलाई हामीलाई किन नबोलाएको भनेको थिए । तर, सरले ‘घर जान मन लागेको छ भने जा’ भनेर हप्काउनुभयो’, अमनले भने ।

अमन त्यहाँबाट निस्किए । पछि गाडी बनेर सामान हाल्दा साँझ परिसकेको थिए । अमनकाअनुसार उक्त समयमा आफुले सुन्ने गरी शिक्षक शर्माले ‘दमै गुको लेडो, जात नभएका भन्दै सुन्नै नसक्ने शब्द प्रयोग गरे । पटकपटक सुन्ने गरी भनेपछि अमनले साथीमार्फत ‘हामीले सुन्यौं अब नभन्नु’ भन्न लगाए । त्यसपछि उनी आफ्नो झोला लिएर अर्को गाडीमा चढ्नतर्फ लागे । तर, साथीहरुले उनलाई सोही गाडी जान जोडबल लगाए र उनी सोही गाडीमा फर्किए ।

उनले मंगलबार बिहान उक्त बिषयमा क्याम्पसलाई जानकारी गराइसकेका छन् । ‘मैले क्याम्पसलाई जानकारी गराईसकेको छु । अहिलेसम्म कानुनी उपचारको विषयमा सोचेको छैन । यो क्याम्पसमा म जस्ता हजारौं विद्यार्थीहरु आउँछन्’, अमनले भने, ‘आगामी दिनमा यस्ता घटना नदोहोरिन पनि केही न केही सजाय त भोग्नुपर्छ ।’