सचिन रानाभाट
लेखनाथ, पौष १७ ।
लेखनाथ उद्योग वाणिज्य संघले बि सं २०५८ सालमा सुन्तला प्रदर्शनी शुरु गरेर अहिलेको लेखनाथ महोत्सवको जग हालेको थियो । बिसं २०६० साल देखि लेखनाथ १ भण्डारढिकमा लेखनाथ महोत्सवको आयोजना गर्दै त्यसलाई निरन्तरता दिदैं २० औं संस्करण सम्म आईपुगेको छ।
तत्कालिन लेखनाथका बजार तथा गाउँका सडक किनार तथा बिजुलीका पोलहरुमा पहेँलो कपडाको ब्यानरमा रातो रंगले “लेखनाथ महोत्सव“ लेखेको देखेपछी लेखनाथ महोत्सव सुरु हुँदैछ भनेर सहजै अनुमान गर्न सकिन्थ्यो। किनकी त्यो बिल्कुलै नयाँ र फरक शैलिको प्रचार शैली थियो र आज सम्म पनि निरन्तर नै रहेको छ।
उक्त समयमा पोखरा तथा लेखनाथ क्षेत्रमा महोत्सवहरुको प्रचार प्रसार गर्न माईकिङ्ग, पर्चा तथा कपडामा लेखेर ब्यानर बनाउने चलन हुन्थ्यो। लेखनाथ उद्योग वाणिज्य संघले प्रचार प्रसार शैली परिवर्तन संगै पहेँलो व्यानरको शुरूवात भने बि सं २०६२ साल देखि गरेको हो। ‘त्यस समय अघि निलो व्यानरमा सेतो तथा रातो व्यानरमा सेतो रंगको प्रयोग गरिन्थ्यो’ – संघका पुर्व अध्यक्ष लक्ष्मी प्रसाद त्रिपाठी भन्छन्।
पुर्व अध्यक्ष त्रिपाठी सम्झनछन – ‘त्यो बेला कर्माचार्य ग्रुपको कोसेली तेल निकै चर्चित थियो, उसको पहेँलो रंगको व्यानर बाट उत्प्रेरित हुँदै लेखनाथ महोत्सवले सैनिक आर्ट्स बाट पहेँलो ब्यानरमा स्क्रिन प्रिन्टको माध्यमबाट प्रचार प्रसार शुरु गरेको हो । आजको मिति सम्म आईपुग्दा पोखरा लगायत देशका अन्य मेला महोत्सवहरुले उक्त प्रचार शैली अपनाएको त्रिपाठी वताउँछन ।’
स्थानीयहरु भन्छन केही बर्ष पहिले हातमा फोन अनि ईन्टरनेटको सुबिधा थिएन, नजिकै भएपनी मेला महोत्सव बारे जानकारी लिन रेडियो सुन्ने तथा पत्रपत्रिका हेर्नुपर्दथ्यो, त्यो सबैको पहुँचमा थिएन। सामान्यतया मुख्य चाडवाड सकेपछी महोत्सवहरुको सिजन हुन्थ्यो। हामीले महोत्सव हुँदैछ भनेर सडक छेउ टाँसेको त्यो पहेँलो कपडामा रातो अक्षरले लेखेको ब्यानर टाँगिएको देखेर सजिलै ठम्याउन सक्थ्यौं ।
“महोत्सव लेखनाथको संस्कृति, स्थानीय उत्पादन बिकास र समृद्धि“ भन्ने नाराका साथ २० औं संस्करणको लेखनाथ महोत्सव यहि पौष १८ गते देखि माघ १ गते सम्म पोखरा २७ डांडाकोनाकमा आयोजना हुँदैछ। महोत्सवस्थलमा गौतम बुद्धको प्रतिमा निर्माण, अक्वारीयममार्फत एक सयभन्दा बढी माछाका प्रजाती अवलोकन, बालउद्यान, खाना महोत्सव, लोकदोहोरी कार्यक्रम, कविता प्रतियोगिता, महिला विशेष रत्यौली गीत प्रस्तुति, सुगम संगीत, लाइभ कन्सर्ट लगायत मनोरञ्जनात्मक कार्यक्रम हुनेछन् । त्यस्तै पोखरा विश्वविद्यालय इन्जिनियरिङ फ्याकल्टी, रोबोटिक क्लब, गण्डकी विश्वविद्यालय आविष्कार केन्द्र तथा विभिन्न विद्यालयहरुबाट शैक्षिक प्रदर्शनी हुने आयोजक संस्था लेखनाथ उद्योग वाणिज्य संघले बताएको छ ।
अर्काईभ बाट पुन: सम्पादन गरिएको।
Discussion about this post