लेखनाथ, ८ फागुन । पोखरा विश्वविद्यालयको १९ औँ दीक्षान्त समारोहमा विभिन्न तह र सङ्कायका गरी ७ हजार ६ सय ५१ विद्यार्थी दीक्षित भएका छन् । विश्वविद्यालय परिसर पोखरा–३० खुदी, ढुङ्गेपाटनमा विश्विद्यालयका सहकुलपति एवम् शिक्षामन्त्री अशोक राईको उपस्थितिमा नेपाल मेडिकल काउन्सिलका अध्यक्षसमेत रहेका प्रा.डा. भगवान् कोइरालाको प्रमुख आतिथ्यतामा मङ्लबार दीक्षान्त समारोह सम्पन्न भएको हो ।
समारोहमा वरिष्ठ मुटु शल्य चिकित्सक, समाजसेवी प्राडा भगवान् कोइरालाले नेपालको दोस्रो विश्वविद्यालय पोखरा विश्वविद्यालयको गुणस्तरलाई अझ बढाउन एकीकृत प्रयास आवश्यक हुने उल्लेख गरेका छन । उनले विश्वविद्यालयहरुमा गुणस्तर कायम गर्नका लागि योग्यता अनुरुप जिम्मेवारी दिइनुपर्ने सुझाव व्यक्त गरे । उनले भने–“विश्वविद्यालय शिक्षामा गुणस्तर कायम गर्न योग्य व्यक्तिलाई सही स्थानमा जिम्मेवारी दिनुपर्छ । विश्वविद्यालयलाई सिक्ने र सिकाउने थलोको रुपमा विकास गर्नुपर्छ ।”
राजनीतिक हस्तक्षेपका कारण विश्वविद्यालयहरुको गुणस्तर खस्किँदै गएको भन्दै उनले देशलाई अगुवाई गर्न सक्ने, समाजलाई नेतृत्व गर्न सक्ने जनशक्ति उत्पादन गर्नुपर्नेमा जोड दिए । नेपालमा पद्धति अनुसार काम हुन्छ, योग्यता, क्षमताको कदर हुन्छ भन्ने विश्वास दिलाउन सके विदेश गएका दक्ष नेपालीलाई पनि फर्काउन सकिने उनको भनाइ छ ।
“विश्वविद्यालयहरुले नेपाली माटो सिकाउँदो शिक्षा दिनुपर्छ र यहाँका उत्पादनले देशलाई सिकाउनुपर्छ, देशबासीको मोडल बन्नुपर्छ,” उनले भने । शिक्षापछि रोजगारी र अवसर नहुँदा नेपाली विद्यार्थी पलायनले विश्वविद्यालयहरु गम्भीर मोडमा पुगेको र राज्यको ठूलो लगानीको पनि उपयोग नहुने अवस्था आएको उनको भनाइ छ ।
विश्वविद्यालयका सहकुलपति एवम् शिक्षामन्त्री अशोक राईले नेपाली विश्वविद्यालय, शिक्षालयहरुले नयाँ कुरा खोजी गर्दा आफ्ना संस्कार, परम्परा, दर्शनको अनुसन्धान र प्रयोगमा उचित ध्यान पु¥याउन नसकेको विचार व्यक्त गरे । विश्वविद्यालयका उत्पादनलाई रोजगारमा जोड्न सरकार शैक्षिक नीतिमै परिवर्तन गर्ने सोचमा रहेको उनले वताए । विश्वविद्यालयहरुलाई प्रतिष्पर्धी, प्रभावकारी र नमुना बनाउन प्राज्ञिक जनशक्तिलाई नै जिम्मा दिइनुपर्ने उनले वताए । “विश्वविद्यालयलाई राजनीतिबाट टाढा राख्नैपर्छ । हामी एक दिन दीक्षान्तमा आएर, कुरा गरेर विश्वविद्यालयहरु सुध्रिने, प्रभावकारी बन्ने भन्ने हुँदैन । प्राज्ञिक व्यक्तित्व आउनुपर्छ ।”
समारोहमा पोखरा विश्वविद्यालयका उपकुलपति प्रेमनारायण अर्यालले विश्वविद्यालयको अवस्था र भावी योजनामाथि प्रकाश पारेका थिए । पोखरा विश्वविद्यालय ऐन २०५३ अनुसार २०५४ मा स्थापित पोखरा विश्वविद्यालयका चार आंगिक महाविद्यालय छन् । विश्वविद्यालयमा एक सय ४५ स्थायी र ५२ करार शिक्षक र दुई सय १२ कर्मचारी कार्यरत छन् । पोखरा विश्वविद्यालयमा तीन संयुक्त आंगीक र ५८ सम्बन्धन प्राप्त महाविद्यालयमा ६४ कार्यक्रममा अहिले ३५ हजार दुई सय ४० विद्यार्थी छन् । चाडै विभिन्न तहमा १६ कार्यक्रम थप गर्ने लक्ष्य लिएको यो विश्वविद्यालयले गत सालबाट पोखरा–३०, खुदीमा एक सय शैयाको शिक्षण अस्पतालसमेत सञ्चालन गरेको छ ।
Discussion about this post