फागुन ९ , लेखनाथ –
लेखनाथ नगरपालिकालाई पोखरामा गाभेर महानगर बनाउँदै सेती पूर्वबाट बिरोध को आवाज उठेकै थियो । मुलुककै ठूलो भूगोलको महानगर केही न केही त विकास त होला नै भनेर लेखनाथवासीले चित्त बुझाए ।
तर महानगर भएर दुईपटक चुनाव भइसक्दा समेत लेखनाथवासीले फरक अनुभूति गर्न नपाएको गुनासो गुन्जिइनै रह्यो । माझठाना लगायतका वडा जाने बाटो अस्फाल्ट गरेकै भरमा महानगरले सेती पूर्व विकास गरेको ठानेको छ ।
यतिले लेखनाथवासीको चित्त बुझेको छैन । पोखरा विश्वविद्यालयको दीक्षान्त समारोहमा सहभागी हुन सोमबार पोखरा आएका प्रधानमन्त्री पुष्पकमल दाहाल प्रचण्डलाई लेखनाथका व्यवसायीले यही गुनासो पोखे । लेखनाथ उद्योग वाणिज्य संघले आफ्नो सभाहलमै लगेर प्रचण्डलाई स्वागत मात्र गरेनन् लेखनाथ नगरपालिका पुनस्र्थापना माग जोडदाररुपमा राखे । पोखरामा लेखनाथ गाभिदा विकासका गतिविधिबाट निकै पछि परेको गुनासो राखिएको संघका अध्यक्ष छत्रधर आत्रेयले राखे ।
उनले यसबाहेक लेखनाथमा औद्योगिक क्षेत्र स्थापना, ताल संरक्षण, हाल उद्योगी व्यवसायीलाई परेका पीडा, क्रसर व्यवसायीहरुको व्यबस्थापन सम्बन्धि नीतिगत समस्याका बारेमा प्रधानमन्त्रीलाई जानकारी गराए । स्थानीय सरकारको नेतृत्वसँग लेखनाथको सिधा पहुँच नपुगेको तथा महानगर प्रमुख वा उपप्रमुखको अभिभावकत्व पाउन नसकेको लेखनाथवासीको सामूहिक गुनासो प्रमसँग पोखे । गुनासो सुनिसकेपछि प्रधानमन्त्री प्रचण्डले पोखरामा लेखनाथ गाभेर एउटै बनाउने बेलामा भएको मतभेद र उद्योगी व्यवसायीको वर्तमान समस्याका बारमा आफू अवगत रहेको र यस विषयलाई गम्भीररुपमा लिएको बताए।
Discussion about this post